top of page

Haen na an EDSA?



Nag-agui an Pebrero 25 na mayo ako namati o nadangog tungkol sa pig-aapod kadto na EDSA Revolution kan 1986.


Garo an importante sa mga tao ngonyan bako an pag-guiromdom kan pangyayare 37 anyos na an naka-agui kundi an mahalaga an holiday pay asin mayong trabaho opisina o eskwela. Kanya-kanyang lakaw.


Kun sabagay Biyernes pa petsa 24 mayo nang laog sa trabaho o eskwela ta holiday economics daa. Kan Sabado petsa 25 mayong deklarasyon nin holiday ta dati na daang naedeklara kan enot pa.


Si mga rally-rally na pig-anunciar sa radyo asin telebisyon mayo man nangyare ta linangaw huli ta si dating lumang lalawgon asin boses iyo man sana an nagpaparakururahaw. Mayo nang iba maski mga juvenes dai interesasdo.


Naguiguiromduman ko ta ako miyembro kan UNIDO kaidto ni Luis Villafuerte Sr., Edmundo Cea, Rolando Andaya Sr., asin Ciriaco Alfelor na pig-bansagan na “ Apat na Aguila”, kami an nagbarantay na dae madaya an Snap eleksyon kan taon na idto.


Rinibo an dinara kan 4 na Aguila na mga tao sa Kapitolyo sa Pili tanganing bantayan na dae madaya an resulta kan pirilian lalo na sa kamot kan Comelec kaidto.


Naenot si People Power sa Pili antes kan duman sa Metro Manila. Maski si militar kaidto digdi sa CamSur dae nakaporma sa atubangan kan mga namamanwaan na disidido kontra sa darayaan. Maiisog pati.


Sa Manila an Simbahang Katoliko an nangapudan sa namamanwaan na suportaran an pig-aapod kaidtong EDSA Revolution kontra sa nakatukaw na Presidente Ferdinand E. Marcos Sr.


Si Marcos binayaan na kadto kan saiyang Defense Minister na si Juan Ponce Enrile asin AFP Chief of Staff Fidel V. Ramos, na saiyang pinsan. Garo may nag-pressure sainda na taga luwas.


Kaya bigla sana bagang nadaog sa eleksyon si Marcos para Presidente asin Arturo Tolentino para Bise-Presidente.


Bigla man na pig-proclamar si Cory Aquino bilang bagong Presidente. Turubod man si tao huli ta si Marcos asin an saiyang pamilya ipiglayog na pasiring Hawaii, America.


Kan nakatukaw na si Aquino an pigngaralasan kan mga tao iyo ta na dae lamang nasambitan kun siisay talaga an nagpagadan ki Ninoy Aquino, an esposo kan bagong Presidente.


Bago na an lalawgon sa Malacaήang, primerong babae si Cory Aquino pero sa mga provincia iyo man guiraray an politika ta nag-iiriwal si mga lokal kun sairisay an ma-OIC poon mayor sagkod mga konsehales asin mga kapitanes.


An jueting padagos man guiraray asin an makangalas kaidto ta abang kukusog kan boot kan mga nagpapabistong rebeldeng NPA.


An mga parapataya nin jueting arog kan koryador luwas laog sa mga municipyo patin mga estasyon nin pulis bako lang sa banwaan, ciudad, provincia kundi sagkod sa rehiyon. May mga pulis na nagpapataya pa sa mga empleyados asin paratukdo.


An mga sugo kan NPA luwas laog sa mga opisina kan gobyerno pati sa mga harong asin kuarto kan politiko naghahagad nin kun ano an maitatao.


An grabe kaidto ta idtong mga opisyales kan KBL o Kilusang Bagong Lipunan biglang naguin miyembros kan bagong muknaon na Cory Coalition.


Si mga Cory Coalition na dating KBL na may mga kuarta biglang nagbaralimbing, naggarana ta may kuarta asin organisasyon. Si mga idealistic na politiko na iyo an masangle kuta sa mga dating opisyales kadaklan nagkadaraog, KBL man guiraray an nanggarana.


Nawara si Marcos pero an nakaribay grupo ni Cory Aquino na tradisyonal na politiko man guiraray. Kurapsyon dae napondo.


Si dating burucracia ni Marcos, burucracia ni Cory. Resulta: iyo man guiraray.


Iyan an dae malingawan kan mga Pilipino kaya sinda nawaran nin amor sa EDSA Revolution na pig-aapod kan 1986.


Aram kan gabos na idto pig-puersa lang kan mga dayuhan bako kan mayoriya kan Pilipino.

Comments


bottom of page