HAGAD NI BORDADO SA DOTr: Fuel subsidy dapat itao nasa mga tsuper nin tricycle

Nag-atubang sa konsultasyon sa sektor nin transporte si 3rd District Congressman Gabby H. Bordado Jr. kan Camarines Sur sa tahaw kan inaatubang na krisis kan grupo sa padagos na paglangkaw kan presyo sa produkto nin petrolyo sa saiyang pinindugan sa congreso na suspendihon ngona an excise tax sa petrolyo asin pagtunaw kan oil deregulation law.


Bako lang pampasajerong jeepney an calificado sa fuel subsidy envez an mga tsuper kan tricycle huli ta kabale sinda sa programa kan Department of Transportation (DOTr) sa paagi kan Land Transportation Franchising and Regulatory Board, sabi pa ni Bordado.

Congressman Gabby H. Bordado Jr. kan tercer distrito kan Camarines Sur nag-aatubang sa konsultasyon sa sektor nin transporte.


Ginibo an konsultasyon sa barangay Bagumbayan Norte, Ciudad nin Naga kan Marso 11 na inatendiran kan lideres asin miembros kan manlaen-laen na organisasyon nin transporte.


Hinagad na ni Bordado sa DOTr na dapat itao na an fuel subsidy sa sektor nin tricycle mantang nagcoconsumo sinda nin gasolina na mas halangkaw an presyo kumpara sa PUV asin bus asin iba pang pampasajerong sasakyan.


Kabale siya sa mga lehislador na naghuhorot magpa-apod na nin special session sa congreso si Presidente Rodrigo Duterte alagad puedeng mag-aksyon an jefe ejecutivo na suspendiron an excise tax asin oil deregulation law.


Kun hehelingon segun pa ki Bordado sa Internal Revenue Code, pueding gibohon ini kan gobierno maging iba pang buwis lalo na sa economia nganing mapugolan an pagparalangkaw kan presyo kan sinambit na produkto.


An tricycle nagcoconsumo nin gasolina na mas halangkaw an presyo sa crudo na ginagamit kan PUV mantang mandato sa DOTr kan ley na magtao nin fuel subsidy para sa tricyle, segun pa sa lehislador kan tercer distrito kan Camarines Sur.


Si Bordado na naging consejal asin bise alcalde sa Ciudad nin Naga aram na an operasyon kan tricycles sakop kan mga lokal na gobierno alagad hinahagad niya sa DOTr na dapat ibale sa subsidiya sa gasolina.


Cantidad P6,500 an fuel subsidy hale sa budget kan Department of Budget and Management na may total nin P2.5 bilyon na ayuda sa public transport sector.

Sektor nin transporte, jovenes asin progresibong grupo sa Camarines Sur nagpoprotesta na tunawon na an old deregulation law asin suspendiron an excise tax nganing mabawasan pagparalangkaw sa presyo kan petroleum products. BAYAN CAMSUR


Igwa nang mga jeepney sa Camarines Sur an nagrecibe kan subsidia alagad bako pang gabos. Huli kaini, nag-aapelar na an representante kan tercer distrito kan CamSur sa DOTr asin LTFRB na itao na an subsidia na dapat maintindihan an kamugtakan kan sektor nin transporte.


Sinabi ni Bordado an congreso nag-alokar kan sinambit na cantidad sa irarum kan 2022 General Appropriation Act (GAA).


Sa entrevista ki Domingo Forlaje, general manager kan Pistton Transport and Mulitipurpose Cooperative sa Ciudad nin Naga, sinabi kaini na enterong apektado na an saindang sektor mala ngani si ibang mga tsuper ninda naglaog nalang sa mga konstruksyon asin iba pang trabajo mantang nalulugi man sana sa maghapon na kayod.


Si dating 150 miembros ninda sa PISTON maabot na sana sa 50 por ciento an nagkakayod. (dpa)