Halangkaw na rate sa “learning poverty’’ nakakaalarma, sabi

Disganado si Assistant Minority leader Congressman Gabby Bordado Jr. sa edukasyon sa Filipinas kun dai tolos mareresolberan an pinaluwas na report kan World Bank, na an satong nasyon saro sa mga nasyon sa may pinakalangkaw na rate sa ‘‘learning poverty’’ sa East Asia asin Pacific region.

Mala ngani sa ginibong committee hearing kan Committee on Education sa Carama-Baja saiyang ginisa nin mga kahapotan si Director Gilbert Sadsad kan DepEd Bicol kun ano an ginigibong programa kan ahencia sa isyu kan ‘‘learning poverty’’ alagad dai tolos nasimbag envez sinabi na igwa na sindang ginigibong paagi nganing ma-adjust an problema lalo na sa paggamit kan mother tongue.


Sa FB post ni Bordado saiyang sinabi, INTERPELLATING THE DEPED REGIONAL DIRECTOR : ‘‘I interpellated Dr. Gilbert Sadsad, regional director of DepEd Bicol, regarding the learning ‘‘poverty rate.’’


Sinabi pa sa datos kan World Bank na sa diez-anyos, siyam sa cada sampulo Filipino an nadidificilan pa na magbasa dawa mga simpleng tataramon. An sinambit na edad si mga grade IV pupils, sabi pa kan representante kan tercer distrito kan Camarines Sur.


May mga experto sa edukasyon na saindang pig-rerecomendar gibohon nang abot sa grade VI an pagtukdo sa mother tongue poon kindergarten hasta sa Grade VI.


Sa presente sa programa sa pagtukdo kan DepEd poon kindergarten hasta Grade III.


Kun sundo sa grade VI dapat luway-luway nang ilaog si english saka Pilipino.


Dinagdag pa sa paliwanag ni Sadsad ki Bordado sa ngunian dai pa sinda nagkakaigwang difinidong pag-aadal alagad hehelingon niya kun ano an pinaka-marhay na solusyon.


Masupog na kun arog kaini sa Filipinas sa maarabot na taon, sabi pa ni Bordado kan makuanan nin entrevista kan Bicol Mail.


SA DEPED NAGA


Sinabi ni Dr. Manny De Guzman, City School Division sa Ciudad nin Naga kan makaulay kan BM mayo pa sindang ginigibong survey o pag-aadal sa kamugtakan kan mga nasa grade IV arog kan pigsasabi kan World Bank sa halangkaw na rate sa learning poverty.


Igwa man nakaulay an BM nin nagkaperang mga paratukdo na habo nang magpasambit kan saindang pangaran na dakul na mananggad na grade IV pupils maging sa grade V nadidificilan magbarasa.


Mientras tanto sa mga pahayag man ni Acting Executive Director Justin Raagas kan Philippine Business for Education na saro sa solusyon sa problema iyo an pagbalik kan face to face classes.


Saro pa sa pigdadahilan iyo an nangyaring mga lockdown huli kan pandemya asin an modular learning maging an problema sa pagtios kan familia asin pagkulang-kulang classroom.


Si VP asin DepEd Secretary Sara Duterte igwa nang kasugoan na ibalik na an full face to face classes sa Noviembre 2022.


Napag-araman pa sa DepEd national na igwa nang ginibo an ahencia kan learning recovery framework plan nganing atubangon an learning gaps na epekto kan pandemya sa mga estudiantes. (DPAureus)