HALE SA FONDO KAN RICE TARIFFICATION LAW: P340.6-M pigbabariwas sa mga paraoma sa Bicol

Tolong taon nang nagrereclamo an paraoma sa hababang presyo kan paroy huli sa Rice Tariffication Law (RTL) alagad an Department of Agriculture (DA) sa Bicol nagdidistribuer na nin ayuda sa mga paraoma nin tig-a Php5,000 na dapat may pig-ooma nin kulang sa duwang hektarya.

Sa anom na provincia sa Kabikolan igwang rehistradong 68,118 na mga paraoma base sa data base nin paraoma sa listahan kan Farmers Registry System for Basic Agriculture Services asin sinda an mga benepisyaryo.

Si Emily Bordado, regional spokesperson kan DA Bicol nagsabi sa sinambit na rehistradong paraoma sa tig-a Php5,000 igwang total na Php340,590,000 an pigbabariwas sa paagi nin ATM card sa lambang benepisyaryo.

An fondo hale sa tariff collection kan Rice Tariffication Law sa mga nag-aangkat nin imported rice na mga negosyante.

Igwa nang enot na pigtaong ayuda hale sa fondo kan RTL siring kan mga makinarya, irrigation system kan mga paraoma asin banhi, sabi pa ni Bordado.

Igwa nang natapos na provincia sa pagbariwas mantang an iba patapuson alagad an Camarines Sur na may 9,840 benepisyaryo dai pa nakakapuon huli ta hinahalat pang magtalaan nin petsa asin bulan sa gobierno provincial.

Dinagdag pa kan DA Bicol an distribusyon kan ATM card puedeng gibohon cada distrito mantang an pagkobra kan biyaya sa paagi kan Land Bank of the Philippines alagad kun nuarin matalaan hinahalat pa an provincia.

Ika duwang taon na ngunian an pagbariwas kan sinambit na biyaya sa mga paraoma.

Mientras tanto, an grupo nin paraoma na pinamamayohan ni Tess Cielo kan Women’s Farmers Organization sa Bicol nagpahayag dawa nagtataong ayuda sa paraoma an gobierno sa dikit na cantidad alagad perang taon nang apektado kan hababang presyo kan paroy huli kan RTL.

Naging ley an RTL kan permihan ni Presidente Rodrigo Duterte kan Febrero 2018 na padreno si senador Cynthia Villar sa senado.

An saindang panindugan ibasura na an RTL mantang an nakikinabang sana iyo an mga higanteng negosyante bagas na iyo an nagdidikta kan presyo sa mercado.

Si Congresista Gabby Bordado kan tercer distrito kan Camarines Sur nagpahayag na sa masunod na 19th Congress itutulod niya na enmiendahan an Rice Tariffication Law na dapat dai man apektado an mga paraoma. (DPAureus)

Nag-oomang kulang sa duwang hektarya may biyaya hale sa Rice Tariffication Law. (Retrato kua kan DA Bicol)