Happy an mga Noranian

Grabe an kaogmahan ni Tyang Benying (Mrs. Virginia Antonio Flores, residente kan Calle Camia, digdi sa Ciudad nin Naga kan saiyang mabaretaan sa radyo na an saiyang idolo na si Nora Aunor pinag deklara kan gobyerno na sarong National Artist, pinaka halangkaw na titulo sa linya nin Arte asin Cultura. Si Tyang Benying, naging daraga kan mga taon 60, iyo an matuang aki ni tyong Liloy (para buno nin orig) asin Tyang Andang (para tienda nin dinuguan), saro naman na Lola nin mga matatabang aki, asin ina nin mga professional na mga akin na nagdarakula nna iguang marhay na pang uugali. Si Tyang Benying an natandaan kong Die-hard fan ni Nora Aunor ta an gabos na kanta ni Nora Aunor haros to-om asin paboritong e-rekwes sa mga announcer sa radyo. Gabos na pelikula ni Nora Aunor na kapartner si Tirso Cruz III (Guy & Pip) dai nanggad pinapa lihis na dalanon sa mga sinehan ni Bichara asin ni Almeda. Si Tyang Benying, sa edad na 70, na ngonian makusog pa maglakaw pasiring sa Centro para magsaod dai nanggad nakakalingaw kun gurano kagayon kan buhay kaidto na an kaogmahan kan mga kadaragagan iyo an maka iba sa Nora Aunor Fans Club Bicol Chapter ta ang mga Noranians interong lakop sa Pilipinas pati duman sa America. Pero dai man pig arog ni Tyang Benying an gawi kan ibang bading na Noranians na gustong arogon an arong sa pisngi ni Nora sa paagi nin pag kaag nin itom na uring o bagaman tentalankin. Antes naging Superstar, si Nora Aunor, nabisto sa Naga ta ini pirmeng kampyon sa amateur sa Plaza Quezon, asin an magabat na karibal ni Nora sa karantahan iyo an kolehiala na si Neddie Decena (tugang ni Announcer Bennie Decena). Sa ginibong finals kan Liberty Big Show, nag tabla an score ninda Nora Aunor asin Neddie Decena, kaya pinag desisyonan kan mga judges na an mag break kan tie iyo an emcee na si Fiorel Salvo, an saiyang pinili na kampyon iyo si Neddie Decena. Sa istorya ni Fiorel Salvo ( based in New Jersey ) an dahilan kaya pig paboran niya si Neddie Decena ta naisip niya an National Finals duman sa Manila na an mag raralaban iyo an mga magagayon asin mga guapong parakanta asin nagkataon maputi si Neddie Decena asin medyo may hitsura kesa ki Nora Aunor. Magpoon kaidto, nakatanom sa boot ni Nora Aunor an hinanakit ki Fiorel Salvo mala ta dai daa siya pig ti’no ni Superstar Nora kan mag krus an saindang landas duman sa Manila ( Si Fiorel naging sikat na announcer sa Manila). An lanob sa sala kan harong ni Tyang Benying, nakadukot an mga retrato ni Guy & Pip ( pig gunting hale sa Liwayway asim Bulaklak), pati na an mga plaka ni Nora, naka display sa sala tanda nin pagigi niyang dayupot na Noranian. Saro sa mga istorya sa reunion kan CSNHS Batch 74, iyo an tungkol sa sarong mabooton na maestra sa Pilipino asin Social Studies, ini mayong iba kundi si Mrs. Dizon ( an harong kataid kan Ice Plant sa Abella) sarong taga hanga ni Nora Aunor. Naging ugali kan saiyang mga escuela an mag regalo saiya nin retrato ni Nora Aunor karibay an kaogmahan na dai maanggotan ta kung mayong ginibong preparation sa assignment. An sakuyang amigo na si Atty. Francis Serrano, bistadong record collector sa Manila alagad ini tubong Libon Albay, kaamigo kan mga parakantang Frank Sinatra, Four aces, Patti Page, asin iba pa ta personal niyang nakakaulay an mga ini sa pagbisita sa Pilipinas. Bilang sikag na Record Collector, saray-saray niya an milyones na kanta ninn mga singers kan 50s, 60s, asin 70s asin haros bistado ni Atty. Serrano an mga sikat na parakanta sa Hollywood arog kan Rat Pack asin si Tony Bennett apwera lang ki Tom Jones ta dai niya gusto ang kurahaw kan nguso kaini. Alagad an para ki Atty. Serrano, an pilipina na iguang pinaka magayon na boses asin magayon mag kanta na pwedeng itampad sa mga taga Hollywood mayong iba kundi an bikolanang si Nora Aunor. Sa analysis ni Atty. Serrano, mayong kaparehong boses si Nora Aunor, an saiyang malipot na tingog solamente saiya sana, alagad medyo may hawig an estilo ki Brenda Lee. Sa pagka pili ki Nora Aunor bilang National Artist, gulping mga noranians an nag cecelebrar sa kaogmahan na pano nin orgullo ta haloy naman nanggad na, na dapat pig sablay sa saiyang abaga an pagiging National Artist. Sa pag arte dai nanggad matatawadan an tibay ni Nora Aunor ta gulpi ining award na naresibe. An sarong sadit na pelikulang bikol na pig gibo ni Nora iyo an pig direjer ni Kristian Sendon kan Ateneo de Naga na pig ladawan an mga kaugalian asin kulturang bikolnon. Saro sa pig hangaan ko ki Nora iyo na dai siya nakaka lingaw mag taram kan Bicol-Naga asin Bicol-Iriga. An solamenteng insidente na nagka atubang kami personal ni Nora Aunor, iyo kan siya maging political guest sa programa ko sa DWRN.