‘’HAPPY HEART’S DAY’’ SA BMC KAN FEBRUARY 14: 69 anyos pinakaenot na operahan sa puso

Ciudad nin Naga --- An Bicol Medical Center nagpahayag na an ‘‘Valentines Day’’ iyo an tunay na ‘‘happy heart’s day’’ sa BMC matapos kan pinakaenot na open-heart surgery sa dai palang nahahaloy na inaguraran na Cardiac Center.

Pinangenotan ni Dr. Elmo Bombase Jr., Cardiovascular Thoracic Surgery and Coronary Artery Bypass Grafting (CABG) surgery, na kinunducir kan Viernes, Febrero 11, 2022, puon alas 10:00 nin aga hasta alas 8:00 nin banggui.


Binantayan nin halawig na oras an pasyente babae na nag-eedad nin 69 anyos.


Kabale pa sa mga principal surgeons sa operasyon iyo sinda Dr. Chris Ocampo, Dr. Kathleen Cruz, asin Dr. Joseph Bichara; kaibanan sinda: Cardiac Anesthesiologist, Dr. Sarah Angeles; Interventional Cardiologists, Dr. Karl Chavez asin Dr. TJ Santy; Intensivist Dr. Elmer Linao; Pulmonologist, Dr. Jean Dy; and gabos na resident doctors, nurses na pinamamayohan ni Ms Tess Savilla, perfusionists, radiation and echo technologists.


An BMC Cardiac Center binasbasan kan Oktubre 18, 2021 antes nagretiro sa serbisyo si dating Medical Director Dr. Francisco Sales na presente sinda dating medical director Dr. Efren Nerva, Secretary kan DOH Francisco Duque, dating DOH Secretary Ona na nagtabang nganing marealisar an modernization kan hospital asin 3rd District Congressman Gabby Bordado.

Antes kan inagurasyon pinaheling ni Dr. Nerva sa Bicol Mail an kumpletong laboratoryo asin iba pang ekipahes sa Cardiac Center.


Si Nerva, na iyo an enot na nag-introducer kan blueprint kan modernisasyon kan BMC asin kinumfirmar kan naretiro palang na medical chief Dr. Sales, na iyo an nagpadagos kan legacia ni Nerva.


Afuera pa kaini, kan administrasyon kan dating medical director siya an nakahagad nin dakulang fondo ki dating DOH Secretary Ona arog kan walong escalon na edificio, limang escalon asin igwa pang tolong escalon na edificio.


Sa presenting bagong Medical Director, Dr. Ronnie Gigantone III na piglalaoman sa saiyang liderato sa maabot na mga taon magiging ‘‘mega’’ hospital an BMC.