HARABHADAB

Tigsik ko an mga abugado ni BeePee

Sa impeachment trial nangangamote

Nagin makangirit sa national TV

An laptop masagapak sa saindang kukute

Tigsik ko an magtugang garong pirming maurag

Kun mag-asta feeling dae mabubungkag

Mala ta nagtarakig, naghagad agap

Baka maremate, dagos MATIBAG!

Tigsik ko si Senador, paepal pirmi

An bunganga labi-labi pirming labi-labi

Suhay sa hawak an mga pigsasabi

Kalot sadiring lulubngan, ligwak kukute!

Tigsik ko an Senador na urag-uragon

Nagpalusot kuta na siya helangon

Alagad makusog pa sa pitbull, sabi kan doctor

Num, ta sa city jail siya pigkunkon!

Tigsik ko si Senadora Dramatista

Sa sobrang stress nakarulosyang na

Naghahalhal, miss na miss na an banwa

Hoy, Senadora, kumusta ka na?

Tigsik ko an duwang senador paepal talaga

An saindang daghan naghaharabhadab na

Tibaad sa masunod na semana

Sinda naman po mga kakosa!