Harana Festival 2024 maranga sa Puso
Ni Sonny Malate
San Jose Partido, Camarines --- Gigibohon sa Pebrero 15 hasta 17 an ikaduwang presentacion kan famosong Harana Festival magpoon kan ini buhayon liwat kan local na gobyerno kan nagtalikod na taon. Ini may temang “ Sararo, Sarabay sa Agyat kan Buhay”.
An Harana Festival namundag kan taon 2003 durante kan termino ni dating Alkalde Atty. Gil P. Pacamarra, sa pag-encaminar asin suporta financial ni dating congresista Felix William B. Fuentebella, ngonian undersecretary kan Department of Energy. Kan taon 2010 ini napondo sa paglaog kan bagong nakaribay na administracion na nag-initiar man nin sadiring festival.
Kan nakaaging taon an Harana Festival liwat na binuhay kan local na gobyerno sa paagi ni Alkalde Jerold B. Peña. Ini nin huli sa pag-apreciar niya kan contribucion kaini sa pagpreservar asin urog na pagparambong kan cultura kan saiyang banwa.
Pighihiling man ni Peña an dakulaon na potential kan festival sa turismo asin economia kan San Jose Partido nin huli ta dati na ining midbid kan dakol na katawohan. May mga esfuersos man na ginigibo an local na gobyerno tanganing mas mabisto pa ini.
An harana sarong suanoy na kaugalian kan mga lalaki sa pagranga kan puso kan kursunadang babaye sa paagi nin musika nin pagkamoot. An pagkanta ginigibo sa tungod kan bintana kan harong o dinadagusan kan daraga pagkabanggi, sinasabayan kan gitara.
Kan mga enot na panahon ini parating ginigibo sa mga barangay. Sa paagi kaini dakol na pag-iilusyonan an minapoon digdi asin minaabot sa pagkakainagoman.
Sa paagi kan Harana Festival, an musika, magagayon na lugar asin kaugalian kan mga namamanwaan kan San Jose Partido naiiurgolyo kan mga residentes digdi asin naaapreciar kan mga dayo.
Ngonian na taon, an mga tampok na makolor asin makahulogan na actividad sa Harana Festival 2024 iyo an Float Parade Competition, Tribute sa mga Local Artists, Bicol Songwriting and Singing competition, Choral Singing Contest, Harana Rap exhibition, Open Mic Competition asin concert kan duwang bantog na performer hale sa Manila.
Dagdag na tampok iyo an Banchetto de San Jose na mataong dalan sa mga local na negociante tanganing makapabakal kan saindang mga producto sa mga nagpupunta sa festival.
Kabarali sa mga midbid na personalidad na piglalaoman na magigin presente sa festival iyo sinda USec Fuentebella asin Department of Tourism Regional Director Herbie Aguas.
Sa presente, pursigido si Alkalde Peña sa mga esfuersos pasiring sa paggantad kan turismo digdi. Mayor na mga lugar na pigbubusol kan local na gobyerno bilang tourist destination iyo an Archdiocesan Shrine of St. Joseph asin heritage area sa centro kan banwaan kun saen pigpaplano an pagkakaigua nin “Little Vigan”.
Siring man, an portion kan Partido Boulevard sa Sitio Talisay, Barangay Dolo, kun saen sarong tourism hub an nakatalaan na magbutwa sa urog na madaling panahon. An designadong lugar pighihiling na mahatak nin dakol na turista huli sa mga facilidad asin structura digdi, arog kan higanteng icon ni Nstra. Sra. Virgen de Peñafrancia sa Talisay Port, sa atubangan kan Lagonoy Gulf.
Sa paagi kaini, dakula an paglaom ni Peña na an San Jose Partido magkakaiguang significanteng lugar sa tourism map kan bilog na nacion na mabukas kan positibong oportunidad sa negocio asin economia.
An famosong Harana Festival sa San Jose Partido liwat na maranga kan puso kan mga Bicolano. (LGU San Jose Partido)