Harana Festival 2025 maranga sa puso
- Bicolmail Web Admin
- Feb 15
- 2 min read
Ni Sonny Malate
San Jose, Camarines Sur --- Ngonian na bulan nin mga Puso asin National Arts Month, an famosong Harana Festival kan San Jose Partido liwat na maranga sa puso kan mga residentes digdi asin pagtaraid na mga localidad.
An Harana Festival 2025 gigibohon sa Febrero 21-22, may temang “Pamana kan Kultura: Musika kan Tradisyon, Pagkamoot sa Kapalibutan Padanayon.” Events organizer iyo an 1-Atomic na nakabase sa Metro Manila.
An harana sarong suanoy na gawi kan mga kalalakihan sa pagranga kan puso kan kursunadang babaye. Ini sa paagi nin pagkanta nin mga sonata nin pagkamoot pagkabanggi. sa tungod kan bintana kan harong kan babaye. An musica orug na binabagayan kan tanog hale sa gitara.
An Harana Festival namundag kan taon 2003 durante sa panahon ni defuntong alkalde Gil P. Pacamarra. Nagin mayor na harigi sa pagtugdas kaini si dating congresista, ngonian Undersectetary kan Department of Energy, Felix William (Wimpy) B. Fuentebella.
Kan taon 2010, ini naontok sa paglaog kan bagong administrasyon na nagtugdas man nin sadiring festival. Taon 2023, ini liwat binuhay ni Alkalde Jerold B. Peña na nagreconusir kan kahalagahan kaini sa cultura asin potential sa turismo, saro sa priority program kan local na gobyerno.
Segun ki Angela Nicole Carrido, Municipal Tourism Officer, an tema kan Harana Festival 2025 napili ni Alkalde Peña bilang pagtaong importancia sa presenteng kamugtakan kan kapalibutan. An temang ini pigtawan doon sa Bicol songwriting competition, saro sa tampok na actividad sa festival.
Apwera sa patiribayan sa pagcomposo nin kantang Bicolnon, dagdag pang color an float parade competition asin regional chorale singing contest. Siring man, liwat na magkakaigua kan Banchetto de San Jose, night market na pigdadagsa kan publico.
Dawa na ngani pinalipot an periodo kan festival, yaon man giraray an concert na mayormenteng dinadagsa kan rinibong hubenes. Tampok na music artist iyo an bandang Silent Sanctuary.
Dagdag na guest performer si Ched Valencia. Madulot man nin musika an SJP Serenatta asin mga local na banda- Guling-Guling, Isarog Band, Mukna Collectives, asin iba pa- bilang front acts kan tampok na music artist.
Pigbuyagyag kan Municipal Tourism Officer na linalaoman an presencia ninda DOE Undersecretary Fuentebella, Department of Tourism (DOT) Sec. Christina G. Frasco asin DOT - V Regional Director Herbie B. Aguas.
Mientrastanto, sustenido si Alkalde Peña sa saiyang advocacia sa pagparambong kan turismo sa San Jose. Nangengenot digdi iyo an pagtugdas kan “Talisay, A New Important Place”, sarong tourism hub harani sa Partido Boulevard.
Sa presente, nahimo na an Tourist Rest Area digdi. Masunod na icoconstruir iyo an higanteng imahen ni Nstra. Sra. de Peñafrancia, Fitness Park, Passenger Terminal, Fish Market asin Community Plaza.
Sa bulan man kan Abril asin Mayo kabale an San Jose sa collaboration entre sa Sagñay asin Tigaon para sa 2nd Partido Boulevard Summer Festival. Yaon man an Motorally de San Jose, pang nacion na event para sa mga motor riders pareho ni Alkalde Peña.
Naglalaom si Peña na an pagrambong kan turismo mabusol sa San Jose sa significanteng puwesto sa tourism map, mapagantad kan revenue kan municipio asin orug na masustenir kan kagayonan kan localidad asin matampok kan kahoyoan kan boot kan mga namamanwaan digdi.
