Harana Festival ibabalik kan LGU San Jose
San Jose, Camarines Sur --- Ibabalik kan local na gobyerno digdi sa pamamayo ni Alkalde Jerold B. Peña an famosong Harana Festival.
Ini tanganing magin contribuente an sinabing event sa advocacia kan administration niya na mapagantad an cultura, arte asin turismo sa banwaan na ini.
An Harana Festival enot na ginibo kan primerong parte kan decada 2000 durante sa termino ni dating alkalde Gil P. Pacamarra asin reconusido kan Department of Tourism bilang sarong programa sa pagparambong kan culturang Bicolnon. Ini sarong celebrasyon kan pagranga sa puso sa paagi kan magagayon na mga sonata asin musicang Bicolnon.
An festval pirang taon na nagdara nin dakulang kaogmahan, onra asin pagmidbid sa banwaan nin San Jose na may mayaman na cultural heritage, magagayon na lugar asin may mga namamanwaan na mahoyo an boot.
Ngonian na taon 2023, sa pagbwelta kan Harana Festival, ini may temang Cancion nin Paglaom. Ini gigibohon magoon Pebrero 13 hasta 18, 2023. An bulan na Pebrero iyo an Love Month asin National Arts Month.
Mga actividades para sa 2023 Harana Festival kan LGU San Jose kasado na
Segun ki Municipal Councilor Bobby H. Clutario, Chair kan Committee on Culture, Arts and Tourism kan Sangguniang Bayan na pinapamayohan ni Bise Alkalde Virgilio E. Panuelos, kairiba sa mga macolor asin bibong tampok kan Harana Festival iyo an inter barangay/agency float competition, DepEd Cultural Night, 1st Regional Choral competition asin Battle of the Bands.
Dagdag na events iyo an Bicol Songwriting and Singing competition, music video festival, 1st Regional Binibining Harana Festival competition asin an primerong pangrehiyon na Badminton competition.
Bilang dugang na color sa actividad may pighahase na bisitang famosong performer/singer para digdi.
Katuwang kan local na gobyerno sa relaunching kan Harana Festival an Partido Development Administration, oficina ni Cong. Arnie B. Fuentebella, Department of Tourism asin National Commission for Culture and the Arts (NCCA) asin mga privadong sponsors asin stakeholders.
Mientrastanto, pigpahayag ni Alkalde Peña na pinagmarhay kan local na gobyerno na liwat ipadagos an Harana Festival en vez na magmukna nin bagong cultural/tourism event. Ini nin huli ta dati na ining midbid na festival asin may dakulang potential sa pagparambong kan cultura, arte asin turismo kan banwaan.
An turismo saro sa flagship programs kan alkalde asin siya naglalaom na sa paagi kan Harana Festival, an mga recursos na yaon sa San Jose arog kan mayaman na cultural heritage, magagayon na lugar asin maboboot na namamanwaan magigin dalan tanganing orug na magbaskog an lugar kaini sa tourism map kan distrito kan Partido.