Harana Festival nasa ika-apat nang taon ngonian
- Bicolmail Web Admin
- 1 day ago
- 2 min read
Ni Sonny Malate
San Jose, Camarines Sur--- Nasa ika-apat nang taon an famosong Harana Festival sa administrasyon ni Alkalde Jerold B. Peña magpoon kan buhayon liwat ini kan taon 2023. Arog kan dati, ini linalaoman na macolor, magayon saka bibo asin dadagsaon kan rinibong katawohan.
An festival namundag kan taon 2003 durante sa termino ni defuntong Alkalde Atty. Gil P. Pacamarra, sa pag-encaminar ni dating Congresista asin ngonian Department of Energy ( DOE) undersecretary Felix William (Wimpy) B.
Fuentebella para sa pagparambong kan cultura, arte asin turismo sa Partido Area.
Kan taon 2010, pagtukaw ni dating Alkalde asin Board Member Gilmar S. Pacamarra, aki kan gurang na Pacamarra, ini naontok asin pigribayan nin bagong festival na dae naghaloy asin namidbid arog kan Harana Festival.
Kan primerong termino ni Peña, ini ibinalik mantang nahiling niya an dakula kaining potential.sa paggantad kan cultura, turismo asin economia kan banwa.
An harana sarong suanoy na kaugalian kan kalalakihan sa pagranga kan puso kan sarong babaye sa paagi kan gayon kan cancion nin pagkamoot. Sa ngonian bihira o mayo na kaining naggigibo kaya kakadikit na an nakakaaram kaini orug na an hubenes.
An festival nagresulta sa pagkamidbid kan mayaman na cultura kan San Jose asin an pig-oorgulyong marhay na gawi kan mga namamanwaan digdi, may mahoyong boot, religioso asin marhay sa pag-estimar sa mga bisita o dayo.
Sa pahayag ni Alkalde Peña, an numero unong pang-engganyo sa mga bisita sa San Jose iyo mismo an marhay na ugali kan mga tawo digdi. Dagdag pa iyo an mga magagayon asin mapreskong lugar asin managom na pagkakan digdi.
Initialmente, an local government unit (LGU) naglatag na kan enot na mga actividades para sa festival. Ini an Songwriting Master class, Regional Choral competition, Inter- School Cultural Dance competition, harana float parade competition asin an Banchetto de San Jose.
Segun ki Angela Nicole R. Carrido, Municipal Tourism Operations Officer, sa mga maabot na aldaw maaaraman pa an ibang actividades. Siring man, an mga aldaw na gigibohon ini na posibleng sa ikatolong semana kan Febrero.
Sinabi pa ni Carrido na maaaraman sa saindang FB posts an mga performers hale sa Metro Manila asin mga local na banda asin parakantang magiging front acts. Sinda an minaserbing dakulang panghatak sa rinibong mga hubenes sa concert night sa laog kan festival.
Linalaoman man an presencia kan haralangkaw na oficiales kan gobyerno sa distrito asin oficina rehiyonal kan Department of Tourism ( DOT) asin mga stakeholders.
An Harana Festival sa bulan na Febrero iyo an enot ngonian na taon sa mga macolor, maogma asin bibong actividades na pigmamaigotan ni Peña na ilatag tanganing ibusol an saiyang programa sa cultura, turismo asin economia kan banwa.
Masunod digdi iyo an pangnacion na motor riders event asin famosong actividad religiosa na piglalaoman kan alcalde na macomplemento sa saiyang vision na maging buhay na buhay an turismo digdi. Dagdag pa an pagcompleto kan "Talisay Port: A New Important Place," sarong tourist hub sa vicinidad kan Partido Boulevard.
Comments