HB 6712 NI BORDADO SA CAMARA-BAJA: Pagcrear dugang na LTODO sa CSur aprubado na

Aprubado na sa Camara-Baja dai palang nahahaloy an House Bill 6712 na minacrear bilang regular Land Transportation Office (LTO) District Office sa municipalidad kan Pili, Camarines Sur.

Si Representante Gabriel H. Bordado Jr. kan tercer distrito kan Camarines Sur padreno kan bill nagkumfirmar sa Bicol Mail asin sa ngunian yaon sa senado para sa deliberasyon asin kun maaprubar isasakat sa Malacañang nganing pirmahan ni Presidente Ferdinand R. Marcos Jr. bilang ley.

An HB 6712 ‘‘An act creating a regular LTO District Office in the municipality of Pili, Camarines Sur to be known as the LTO Licensing Center of Pili, Camarines Sur, Camarines Sur, appropriating funds therefor and for other purposes’’

Sa ngunian igwa nang opisina an LTO sa kabesira kan provincia na pinamamayohan ni OIC Eric Torrecampo alagad extension office sana kan LTO District Office sa Ciudad nin Naga.

Si OIC Torrecampo nagpahayag nin pasasalamat huli ta madaling na-aprubaran an bill ni Bordado mahalat nalang sinda kan marikas man na aksyon sa senado.

Sinabi kan representante kan tercer distrito sa tahaw kan mahibog na kliyente kan LTO District Office aroaldaw alagad halaba pa an mga nagpipila na dakulang bagay sa mga taga Pili, Camarines Sur asin pagtaraid na banwaan nganing dai na maggastos pagviaje sa Ciudad nin Naga.

Antes sinangat an HB 6712 , sinabi pa ni Torrecampo nagkaulay sinda Bordado asin LTO regional director Franciso Ranches na pinaboran asin nagpasalamat sa bill kan lehislador sa tercer distrito kan Camarines Sur.

Kun maaprubaran sa senado an bagong District Office magkakaigwa nin dugang na employment asin bukas sa pagkua nin lisensiya sa pagmanijo asin student permit.

Sa limang congressional district sa Camarines Sur an district office sa Ciudad nin Naga iyo an pigdadagsa nin mga kliyente aroaldaw.

Sa ngunian an iba pang mga district office kan ahencia iyo an Partido District, sa Ciudad nin Iriga sa Rinconada area, Pamplona asin Ragay, Camarines Sur asin dai mahahaloy sa kabesira kan provincia. (dpa)