HB 7354 APRUBADO NA SA CAMARA-BAJA: Evacuation centers ibubugtak sa cada ciudad, municipalidad

Aprubado na sa ika-tolong pagbasa sa Camara-Baja an House Bill 7354, saro sa Principal Author si Congresista Gabriel H. Bordado Jr. kan tercer distrito kan Camarines Sur tanganing magkaigwa nin Evacuation Center an manlaen-laen na mga ciudad asin mga banwaan.

Alagad piglinaw ni Bordado na bako lang digdi sa Camarines Sur envez maging sa iba pang mga lugar.

Sinabi kaini, an tercer distrito kan Camarines Sur pirming inaagihan o tinatamaan nin bagyo, kaya dapat parating preparado sa mga tawo na apektado kan calamidad igwang dadakitan nin evacuation center kun igwang nangyayaring tubig baha maging nagdadangadang na bagyo sa provincia.

Nagtutubod an lehislador kan Camarines Sur na makakalusot man giraray an sinambit na bill sa Senado, tanganing dakul matabangan na mga Filipino lalo na kan mga Bicolano kun igwang calamidad.

An HB 7354 iyo an ‘‘An Act Establishing Evacuation Centers in City and Municipality, and Appropriating Funds Therefor’’.

An congresista kan tercer distrito dakul nang mga napagibong Multi-Purpose Bldg. sa Ciudad nin Naga maging sa mga banwaan kan saiyang sakop na distrito na ginagamit para sa opisina kan barangay alagad puedeng magamit pang evacuation center. Alagad nganing mas sadyado sa barangay kaipuhan an ECs. (DPA)