HFMD cases sa Bicol, nakaka-alarma na-DOH

An Department of Health (DOH), Bicol nagpahayag ano man na helang na padagos naglalangkaw an caso iyan ‘‘alarming’’.

Ini an ponto ni Dr. Janish Alcala kan CHD kan DOH sa atubangan kan padagos na naglalangkaw na caso kan Hand, Foot and Mouth Disease (HFMD) na nagluwas sa datus kan bulan nin Oktubre asin Noviembre marikas na naglangkaw an caso.

Sa press conference kan DOH Bicol, kinumfirmar na sa Albay sana igwa nang 585 asin iyo na an pinakalangkaw na caso sa rehiyon cinco.

Sa pinaluwas na datus poon Enero 1 hasta Noviembre 28, 2022 an nagsunod sa Albay iyo an provincia nin Sorsogon na igwa nang 258 caso; Masbate – 48; Catanduanes – 30; Camarines Sur – 4; asin Camarines Norte – 3 asin igwa nang total nin 926.

Alagad dawa naglalangkaw an caso mayo paman nin casualities, sabi pa.

Sinabi pa ni Alcala kabali sa saindang aksyon iyo an surveillance sa mga barangay na dapat isombong tolos sa lokal na gobierno o sa mga Rural Health Unit. Magkakaigwa na digdi nin interbensyon an ahencia nganing maaraman sa paagi nin laboratory kun positivo sa HFMD.

An mga tinatamaan kan caso iyo an mga kaakian sa elementarya na madaling mag-ulakit an virus.

Kaipuhan an kooperasyon kan mga nurses sa escuelahan na kabali sinda sa dapat magpoon kan surveillance asin i-report sa magkakanigong ahencia.

An sinambit na caso nakukua hali sa direct contact sa droplets na may virus sa infected na pasyente mantang kabali sa sintomas iyo an may kalintura, makulog an halamonan, mayong ganang pagkakan, mga lugad-lugad sa kamot asin sa iba pang parte kan hawak.

Hinagad an kooperasyon kan mga magurang na matukdoan an saindang mga aki na dapat importanteng marhay an pag-sanitized o perming maghugas nin kamot.

Madaling mag-ulakit an virus hali sa mga aki nakakapot sa pintoan o ano paman na bagay na makakapotan nin iba.

Patanid pa kan ahencia na an dengue puedeng mahulog sa HFMD kun mapapabayaan an pasyente.

Mientras tanto, sa pinakahuring report hali sa Department of Education sa Ciudad nin Naga, kinumfirmar ni City School Superintendent Manny De Guzman na tolo na an nagpositivo sa kaparejong caso hali sa tolong elementary school kan ciudad.

An classroom tolos man pigpa-disinfect kun saen an aki nag-eescuela mantang dai pinalaog sa klase matapos makumfirmar na tinamaan kan sinambit na helang.

Nagsugo man si De Guzman nganing dai masayang an aldaw kan mga aki dapat tawan ngona nin module sa pagpadagos kan saindang pag-adal. (dpa)