HIGOT PAHA SOLUSYON SA PAGKALUGI: 43 naman na JOs dai namakaka-renew kan kontrata
Luway-luway nang nakakabangon sa problema finansyal an Metropolitan Naga Water District (MNWD) poon na magtukaw kan Hulyo 1, 2022 si Florencio ‘‘Jun’’ Mongoso Jr. bilang Acting General Manager sa laog sana nin perang bulan mala ngani igwang isusunod na 43 na job orders (JOs) na dai na makaka-renew kan saindang kontrata asin dakulang bagay sa dagdag na ‘‘savings’’ kan manijamiento.
Kan Agosto 2022 maabot sa 73 na JOs an pig-terminate an mga kontrata kan manijamiento alagad sa Ph8,000 na pigsusueldo cada sarong empleado sa sainda bulan-bulan nakatipid o magkakaigwang ‘‘savings’’ an water district nin Php584,000.
Si dating Php11.4 milyones na pagkalugi alagad sa ngunian igwa na sanang Php30,000 asta kan Septiembre 30, 2022 mientras na posibleng maaraman sa report kan accounting division sa masunod na semana an natatadang pagkalugi hasta kan Oktubre 2022.
An paghigot paha an ginigibong aksyon kan presenting manijamiento na saro na digdi iyo an pag-terminate kan Agosto 30, 2022 kan serbisyo kan 73 na mga job orders (JOs) mantang igwa pang isusunod na 43 mantang matapos an saindang kontrata sa Deciembre 31, 2022.
Nadiskobre pa kan nagtutukaw na acting general si trabajo para sana sa sarong empleado ginibong tolo kan dating manijamiento.
Afuera pa kaini, pagbawas kan iba pang dakulang gastos sa operasyon kan MNWD na saro na digdi an pagbawal na kan mga ginigibong board meeting sa hotel envez sa sadiring board room kan water district. Mirendalan nalang an gastos kan manijamiento.
Ini an mga pahayag ni Acting General Manager Mongoso kan makunduciran nin entrevista kan Bicol Mail mientras na matatapos na an saiyang anom na bulan termino sa MNWD sa Deciembre 31, 2022 alagad saiyang piglinaw na mayo siyang plano na extendir kan junta an saiyang serbisyo.
Sa Deciembre 31, 2022 maabot sa 43 na JOs matapos kan saindang kontrata asin dai na ire-renew kan manijamiento. An saindang sueldo Php8,000 cada sarong empleado huli kaini, makakatipid naman nin Php344,000 bulan-bulan asin si enot na hinali maabot sa cantidad Php584,000 asin igwa nang total na Php928,00 ‘‘savings’’ bulan-bulan. Dai pa kaayon si mga ginunting na gastos sa operasyon kan water district.
An manijamiento kan MNWD nagkaigwa nin controvercia sa isyu sa overpricing na pagbakal nin mga lote sagcod nakasapog sa kalugihan.
Huli sa mismanagement si Engr. Virgilio Laungsing, sinipa sa serbisyo kan junta directiva alagad sinabi kan dating GM an desisyon sa pagbakal ninda nin lote bako lang siya an envuelto sa desisyon envez maging miembros kan junta directiva.
Nganing maresolberan an mga controvercia sa manijamiento nagkasundo an City Hall asin an junta directiva na patukawon ngona si Mongoso bilang acting general manager sa laog nin anom na bulan na matatapos sa Deciembre 31, 2022. Sa Enero 2023 buelta naman siya sa dating trabajo sa METRO-PESO sa City Hall.
An mga presenting director nag-aatubang nin caso sa pagbalga kan RA 3019 o Anti- Graft Corrupt Practices Act kabali sinda dating GM Luansing asin dating board president George Palma mantang an mga director kinababalihan ninda Gilbert Albuero, Mike Pawid, Marilisa Ampoan, asin Monina Claveria.
Pigreclamo sinda huli sa overpricing sa pagbakal lote na sinangat ni Jake Fortaleza. (DPAureus)