Hinahagad na franquicia kan Bicol Light dapat isikwal na

Pighalimbawa an pag-veto ni BBM sa Davao Light

Nagtutubod an Camarines Sur III Electric Cooperative (Casureco III) Inc. sa Rinconada area na dapat isikwal na kan Congress an ika-apat nang veces na sinangat na House Bill No. 1084 sa hinahagad na franquicia kan Bicol Light and Power Corporation (BLPC).

Sinabi ni Director Wilbur Almoneda igwa nang haros kaparejong bill sa congreso an Davao Light and Power Company nganing sakopon pa ninda an operasyon kan North Davao Electric Cooperative Inc. mala ngani inaprubaran kan Camara-Baja asin Senado bilang House Bill No. 10554, alagad pig-veto ni Presidente Ferdinand Marcos Jr.

An dahilan huli ta malinaw na mabalga sa provisions kan Section 27 kan Acta Republica 9136 o mas midbid sa ‘‘EPIRA mandating that all existing franchises shall be allowed to full term’’ asin RA 6038 o may exclusibong franquicia na mag-operate nin distribution system an North Davao Electric Cooperative sa Davao. Afuera pa kaini an kaparejong cooperativa igwa nang nagdadanay na power supply agreement sa mga generation companies na aprubado na kan Energy Regulatory Commission (ERC) na seguradong ite-terminate kan bagong kumpanya nin kuryente.

An mga proponente kan HB No. 1084 iyo sinda Congresista LRay Villafuerte, Congresista Migz Villafuerte kan ika-limang distrito asin Congresista Tsuyoshi Anthony Horibata kan premir distrito gabos kan provincia nin Camarines Sur.

Sa mga pahayag ni Congresista LRay sa saiyang FB post, ‘‘an solusyon naman para magkaruon ng choice hinde monopoly para magkaruon ng mas mababa at efficient power supply and no brownout ay ma approve na ang Bicol Light and Power Corporation na franchise sa Rinconada at isunod sa iba pa’’

An HB No. 1084 iyo an ‘‘Act granting the Bicol Light and Power Corporation a franchise to construct, install, establish, operate, own, manage and maintain a power distribution system for the conveyance of electric power to the end users on the towns of Baao, Balatan, Bato, Buhi, Bula, Nabua, and the Iriga City, province of Camarines Sur, and for other purposes’’.

Sa lado kan Casureco III, sinabi pa kan director na dai sinda tubod sa paliwanag ni Congresista LRay na kumpetisyon an katuyohan kan BLPC alagad katapos-taposi ‘‘take over’’ sa cooperativa nin electricidad sa Rinconada.

An sinambit na cooperativa nin electricidad nagsumiter na kan saindang position paper contra sa BLPC sa congreso sa paagi ni House Speaker Martin Romualdez asin sa senado sa paagi ni Senate President Migz Zubiri.

Tapos na an isyu sa ‘‘ailing cooperative’’ mantang sa ngunian an Casureco III pigdeclara na kan National Electrification Administration bilang ‘’Triple A’’ na saro nang asensadong cooperativa sa Camarines Sur. (dpa)