HIV case liwat naman naglangkaw

Nagbaba na an caso kan Covid-19 alagad an Human Immunodeficiency Virus (HIV) sa Ciudad nin Naga liwat naman naglangkaw sa 50 por ciento kabale na an bulan nin Septiembre ngunian na taon.


Bako lang sa Naga envez sa iba pang ciudades sa Kabikolan base man sa naikurit kan Department of Health (DOH) sa rehiyon.


Sa Ciudad nin Naga, sa report kan opisina ni Grace Guevara, Medical Technologist Chief kan City Health Office (CHO) kan lokal na gobierno nag abot na sa 90 an caso poon kan Enero 2022 hasta Septiembre 2022 na naglangkaw nin 50 por ciento kumpara kan nagtalikod na taon sa kaparejo peryodo.


Nagtutubod na naglangkaw an numero kan caso sa laog nin siyam na bulan nganing magpa HIV test huli kan mga advocacia sagcod sa mga barangay kan CHO.


Alagad an mga pasyente bako lang hale sa ciudad nag-eestar envez sa iba pang lugar mantang an Naga iyo an centro de negosyo na posibleng mga referral hale sa ibang mga LGUs.


Pigpapadagos kan opisina ni Guevara an campanya laban sa HIV sa paagi nin amay na pagpa-test sa Naga HIV Testing Center nganing mabulong tolos asin malikayan na mag-ulakit asin dai na mag-progreso an caso pasiring sa Acquired Immunodeficiency Syndrome (AIDS).


An HIV dai maaraman tolos kun positivo na sinda alagad nganing makalikay asin salbado sa virus na nakukua sa pakikipag-sex sa ‘‘lalaki-sa-lalaki’’, magpa examin tolos.


An transmission nangyayari hule sa kawaran nin proteksyon sa pakikipag-sex lalo na sa kaparejo lalaki.


Nangapudan pa an ahencia na si nakikipag-sex nin nagkaperang veces dawa kiisay dapat magsumiter na kan saindang sadiri sa HIV tests. (dpa)