Home lots para sa mga pamilyang apektado kan demolition

SI Mayor Nelson Legacion sa saiyang paghampang sa mga residenteng apektado kan demolisyon sa Fernandez Compound, Barangay Sta. Cruz.


Padagos na pigpoproseso kan lokal na gobyerno kan syudad nin Naga an mga lote sa Liberty Village, Barangay Cararayan para sa 16 na pamilyang naapektaran kan demolisyon sa Barangay Sta Cruz kan Setyembre.


Nasa 300 na indibidwal an nagtetenir sa Sta. Cruz Evacuation Center makalihis na boluntaryong maghale sa Fernandez Compound kun saen piggaba an saindang mga istaran kan Setyembre 21.

Segun ki Mayor Nelson Legacion, mantang padagos an pagtaong bulong asin kakanon kan lokal na gobyerno sa mga displaced residents, padagos man an proseso sa mga lote na lilipatan kan mga beneficiaries.


Pigsabi kan alkalde na kumbinsido an mga beneficiaries sa saindang lilipatan na lugar huli ta harani ini sa Balatas New Development Area kun saen pigtutugdok an New Naga City Hospital, Center for Safety and Resiliency asin iba pang infra projects kan saiyang administrasyon.