Housing project ni VP Robredo okupado na

Maabot sa 120 mga familia na benepisyaro kan housing project na nawaran nin harong sa Lupi, Camarines Sur igwa nang sadiring estaran matapos sainda nang okuparon na narealisar an proyekto kan Office of the Vice President (OVP) ka-partner an mga pribadong grupo asin lokal na gobierno.


Kan nakaaging semana binasbasan na an housing project alagad nagrepresentar ki Bise Presidente Leni Robredo an saiyang staff na pinangenotan ni dating consejal Babeth Lavadia kan Ciudad nin Naga asin sa lado kan lokal na gobierno kan Lupi pinangenotan ni Alcalde Lelia Matamorosa.


An kaparejong proyekto pigpunan ni VP Robredo sa Albay asin sa ngunian yaon na sa Camarines Sur matapos mawaran nin estaran an mga benepisyaryo sa danger zone harani sa Riverbanks, Poblacion, Lupi na biktima kan paglamasa kan bagyong Ulysses kan Noviembre 2020.

ANGAT BUHAY VILLAGE. Dating Consejal Babeth Lavadia kan Ciudad nin Naga (naka-stripe na T-shirt) nagtataong mensaje sa ngaran ni VP Leni Robredo dai makaka-atendir sa blessing and inauguration kan 120 units sa housing projects kan OVP sa Lupi, Camarines Sur.


An lugar inapod nang Angat Buhay Village, sarong proyekto ni Bise Presidente Robredo katuwang an University of Nueva Caceres, Kaya Natin Movement, LGU Lupi asin iba pang mga organisasyon.


An participasyon kan mga benepisyaryo nagtabang sa konstruksyon kan mga harong mantang si iba nag-training muna sa pagpintura nganing dai na maggastos asin sinda na mismong ma-okupar kan estaran.


Matapos kan bagyong Rolly asin Ulysses kan nakaaging taon binisita ni VP Leni an banwaan nin Lupi asin naheling niya an kamugtakan kan mga nawaran nin harong matapos magguho an saindang estaran sagcod naghanap siya nin ka-partners nganing marealisar an ‘‘BAHAYnihan’’. (DPA)