HSDO pinipilahan na nin manga aplikante sa 4PHs

Dakul na an nagpipirila sa Housing and Settlements Development Office (HSDO) kan lokal na gobierno kan Ciudad nin Naga nganing maka-aprubetsar sa Pambansang Pabahay para sa Pilipino Program (4PHs) kan Department of Human Settlement Settlements and Urban Development (DHSUD).

Si Engr. Rolando Campillos, jefe kan HSDO sa City Hall nagsabi matapos sana kan ginibong ground breaking ceremony para sa 7 medium-rise condominiums kan Marso 16, 2023 sa Balatas New Development Area (BNDA) na pinangenotan ni Presidente Ferdinand Marcos Jr., maabot na sa 1,600 na mga familia sa ciudad nakasumiter na kan saindang aplikasyon.

Kabali sa saindang hinahagad na rekisitos iyo an mga minasunod; dapat miembro kan Pag-Ibig Fund, mayong rugaring na propriedad, residente kan ciudad, asin iba pa mantang an opisina kan Pag-Ibig Fund iyo an pinalmenteng maaprubar.

Alagad sinabi ni City Administrator Elmer Baldemoro na saindang pig-eevaluar na an 5,000 na mga aplikante sa urban poor na kun igwang kalipikado para sa Pambansang Pabahay saindang aakoon.

Sa listahan kan HSDO kan ciudad dakul nang mga pendiente an maninigo nang matabangan.

An mahiwas na lugar kan BNDA digdi ibabalyo an bagong edificio kan Naga City Police Office, City Hospital, escuelahan asin iba pang mga proyecto kan City Hall.

Kasabay kan seremonya sa BNDA igwa man kaparejong proyecto an gobierno nasyonal sa Panganian Drive kan Concepcion Pequeña, Ciudad nin Naga para sa diez mil na housing units na pamamahalaan kan Capitolio Provincial kan Camarines Sur.

An proyecto saro sa prioridad kan DHSUD para sa Pambansang Pabahay na target an maabot sa 6 milyon na mga familia sa nasyon nganing magkaigwa nin sadiring estaran sa laog nin anom na taon. (dpa)