HULI KAN DEVOLUTION KAN NAT’L AGENCY: Dakul na empleadosmahahalian trabajo

An gabos na mga ahencia kan gobierno nasyonal dapat pag-andaman na an devolution transition plan para sa 2022 alagad dakul na mga empleados an maiipit sa tahaw kan pandemya mantang ciertong iimplementar an retrenchment nin huli ta mayong mangyayaring ‘‘devolution of personnel’’.


Si Provincial Director Melody Relucio kan Department Of Interior and Local Government (DILG) nagpahayag kaini sa tahaw kan gigibohon na transition plan kan mga lokal na gobierno asin kan ahencia nasyonal na apektado huli ta nakatalaan nang i-devolve an iba nindang punksyon sa LGUs.


Alagad saiya pang sinabi si mga apektadong empleados puede maka-aprubetsar kan ‘‘early retirement’’ asin magbalyo sa ibang ahencia.


An ‘‘retrenchment’’ kan mga empleados mientras na ciertong mababawasan an operational budget kan ahencia nasyonal na an fondo ibababa na sa LGUs.


An pagbilog nin devolution transition team dapat igwang koordinasyon an LGUs asin national agency asin an pag-aadal kan punksyon base sa seksyon 17 kan Acta Republica 7160 o Local Government Code of 1991.


An devolution plan dapat isumiter sa Department of Budget and Management (DBM) na iyo an pamayo kan devolution committee.


Si Presidente Rodrigo Duterte nagpaluwas nang Executive Order No. 138 sa implementasyon sa pagbalyo kan mga gagastuson na fondo sa mga proyekto sa infrastraktura, agricultura, social welfare, health care, livelihood asin iba pa.


An EO 138 kasunod man kan iimplementar na Mandanas-Garcia ruling sa 2022 dapat an paghihiras sa internal revenue allotment sa LGU kabale na an buwis nasyonal bako lang hale sa nakokolecta kan Bureau of Internal Revenue (BIR).


An IRA aapodon nang National Allotment Tax (NTA) mantang malangkaw na nin 37.89 por ciento an makukuang NTA kan gabos na LGUs, sabi pa kan DILG.


Kabale na sa listahan sa mga apektadong ahencia iyo an Department of Social Welfare, Department of Agriculture, National Irrigation Administration, Department of Public Works and Highways, Department of Environment and Natural Resources asin iba pang ahencia kan gobierno nasyonal. (DPAureus)