HULI KAN HALAWIG NA MGA PAG-URAN: P81-M danyos sa agricultura

Pili, Camarines Sur --- Maabot sa cuatro mil na mga paraoma sa Kabikolan an apektado kan halawig na mga pag-uran poon kan Deciembre 18, 2022 hasta Enero 23, 2023 asin igwang total na danyos sa agricultura nin P81,107,222.

Sa entrevista kan Bicol Mail ki Lovella Guarin, regional information officer kan Department of Agriculture sa Bicol base sa saindang narecibing damage report hali sa mga Municipal Agriculture Office (MAO) dakulang destroso sa agricultura iyo an tubig baha huli kan ‘‘shear line’’.

Sa sumada igwang total na 1,621 metrico toneladang danyos sa 5,129 na mga hektarya asin apektado si total na 3,962 mga paraoma sa rehiyon.

Alagad dinagdag pa ni Lovella sa mga apektado igwa man tinatabang na libreng banhi an saindang ahencia na pinapaagi sa MAO kan lambang LGUs.

Sa mga damage report sa cada provincia kan Bicol digdi sa Camarines Sur sa paroyan igwang total na P57,542,718; sa maisan – P16,051,455. Sa Masbate sa paroyan – P2,677,500. Sa Sorsogon – sa paroyan – P1,674,779 asin sa Catanduanes sa paroyan – P1,667921; high value crops – P57,000, Livestock – P584,250. Sa Albay – sa paroyan igwang P755,698, apektado si 48 mga paraoma asin 34 hektarya asin sa Camarines Norte – sa maisan – P11,400 na apektado si 40 hektarya mientras na igwang pitong livestock raisers na igwang danyos na P84,500 sa onseng hayop.

Mientras tanto, pig-aandaman liwat kan DA an pagbukas kan saindang Kadiwa Center sa barangay San Agustin, Pili, Camarines Sur mantang pigtawan ngona nin prioridad na matabangan an mga cooperativa nin paraoma na magtugdas nin Kadiwa center. Sinda nagpapabakal nin baratong presyo nin mga produkto. An cada kadiwa igwang ‘‘grant’’ nin on milyon pesos an ahencia. (dpa)

Tubig baha huli kan ‘‘shear line’’ asin LPA bako lang kaomahan sa toong parte kan retrato envez nagsakat na sa tinampo. (dpa)