HULI KAN PANDEMYA: Actividad sa Festividad ni Ina, cancelado

Sa ika-duwang taon liwat iginigilid kan lokal na gobierno kan Ciudad nin Naga an saindang mga preparasyon sa maabot na Peñafrancia fiesta sa Septiembre 2021 mas prioridad an paglaban sa pandemya envez kan mga actividad.

Ini an mas mahalaga mantang an Archidiocesis nin Caceres cancelado man giraray an tradisyonal na translacion asin fluvial procession ngunian na taon, sabi ninda Consejales Joselito Del Rosario asin Salvador Del Castillo.

Suportado ni Bise Alcalde Nene de Asis an desisyon kan caceres asin dapat magcooperar an publiko envez na magruso sa simbahan ipadagos an debosyon ki Ina sa saindang kanya-kanyang harong asin digdi gibohon an saindang mga pag-novena ki Divino Rostro asin ki Nuestra Senora de Peñafrancia.

Si Del Castillo asin Del Rosario iyo an chairman asin co-chairman kan Committee on Military Parade respectavamente cada panahon nin Peñafrancia fiesta alagad ngunian na 2021 liwat nindang pinaturog an komite.

Sinabi ni Del Rosario igwa nang pinaluwas na circular si Obispo Rolando Tria Tirona kan Caceres na liwat cancelado an tradisyonal na traslacion asin fluvial procession huli kaini mayo man dapat pag-andaman an City Hall para sa mga actividad kan lokal na gobierno sa festividad ni Ina.

An regional military parade street competition saro sa dakulang mga actividad kan ciudad kabale na an Miss Bicolandia Beauty Pageant alagad padagos na apektado huli kan pandemya, sabi pa.

CIRCULAR KAN CACERES

Pig-eenganyar kan Caceres an mga familia na ipadagos an saindang debosyon sa saindang kanya-kanyang residencia. Hinahagad pa na gibohon an sarabay na novena sa Divino Rostro puon sa Septiembre 1-9 asin an novena sa imahen ni Nuestra Señora de Peñafrancia puon sa Septiembre 10-18, 2021.

Alagad an mga parokya magkakaigwa man kan saindang novenary masses sa sinambit na mga petsa. An gabos na misa publiko dapat magsunod sa health protocols.

Dai tinutugot an pagkapot asin paghadok sa mga imahen. Alagad an tradisyonal na traslacion asin fluvial procession gigibohon na sa paagi nin motorcade processions sa Septiembre 10-19 na igwang coordinasyon sa LGU.

An mga imahen kan Divino Rostro asin Nuestra Señora de Peñafrancia dai na hahalion sa Peñafrancia Parish Church asin Basilica Minore. (danny p. aureus)