HULI SA BARATONG PRESYO KAN PAROY: Nagdadakol nang paraoma nagtatanum nang natong

Ni Paulo DS. Papa

LAEN pa sa Rinconada Area asin provincia nin Albay, pigkunpirmar kan City Agriculture Office an paglipat kan mga paratanum nin paroy sa pagkultibar nin natong sa mismong mga paruyan sa syudad nin Naga.

Segun ki Acting City Agriculturist Ernesto Asence III, an natong sa merkado nababakal nin P25.00 an dae man ngani malampas sa 10 gramos na supot nin pinaalang na dahon nin natong.

Sabi pa ni Asence, an paruy sa syudad nin Naga nagkakantidad P11.00 sundo P13.00 per kilo.

Kun magin trending an pagtanom natong komo alternatibo sa paluging presyo per kilo nin paroy, halangkawon an posibilidad na ma-industrialize an nasambit na agri product asin patawan man nin taripa kan gobyerno nasyonal sa paagi kan ley segun pa ki Asence.

Alagad kumpyansa si Asence na kun mag abot sa puntong bugtakan taripa an natong, nakaharu-hawas na man an mga paratanom kaini hale sa pagtios dahil sa exportation.

Sa banwaan kan Bula, Camarines Sur: Pigkunpirmar kan Deloverges Agri Farm na nakabase sa Barangay Panoypoyan, Bula, Camarines Sur na luhay-luhay nang naeenganyar an mga paratanom nin paruy na magtanom na nin natong sa saindang mga umahan.

Iyan huli sa kalugian na pigsasapo kan mga parauma sa hababang presyo per kilo nin paruy pakalihis sana kan anihan segun ki Rey Deloverges.

Segun ki Deloverges, sa paagi kan pagtanom nin natong kan mga paraoma nagkakaigwa an saiyang agri farm nin de kalidad na natong - mala ngani nakaka abot na sa merkado kan ibang nasyon sa tabang kan mga export traders.

Sabi pa ni Deloverges, may potensyal na pigtatao an natong, harayoon an baya sa presyo per kilo kan paruy.