HULI SA EL NIÑO: P191.6-M danyos sa agricultura sa Bicol
Abot na sa P191,617.838 an danyos sa apectadong 1,330 paraoma sa Camarines Sur asin Albay asin posibleng maglangkaw pa sa masunod na mga semana huli kan El Niño.
Ini base sa listahan hale sa mga provincial office kan ahencia mantang hinahalat pa an ibang mga report hale sa ibang provincias kan Rehiyon Bicol, sabi ni Lovella Guarin opisyal na parataram kan DA Bicol.
Alagad aprubado na kan Philippine Crops Insurance an ‘‘indemnity claims’’ kan 119 paraoma mapadapit sa danyos sa El Niño na iguang total na cantidad P545,546.
Dai palang nahahaloy kan magbisita si DA Secretary Francisco Tiu Laurel Jr. asin nagtaong ayuda na cantidad P58.37-M.
An ahencia naka-andam na sa posibleng maisog na El Niño na kabale sa apektado an Rehiyon Bicol sa paagi kan mga programang irrigation assessments, crop shifting, asin ayuda sa apektadong mga paraoma.
An PAGASA nagkumfirmar kan mangyayaring El Niño asin dakul na mga provincia an ciertong maaapektohan.
Alagad an ibang grupo nin paraoma nagsabi na kulang an mga tabang o subsidiya kan DA sa tahaw kan patanid sa posibleng mahiwas pang maapektohan na omahan huli kan tag-alang.
Afuera pa kaini, an reclamo kan iba bako man gabos na apektado natatabangan. Alagad an paliwanag kan ahencia dapat magrehistro an gabos na paraoma sa Registry System for Basic Sectors in Agriculture (RSBSA) nganing macierto na makakarecibe nin ayuda.
Comments