top of page

HULI SA HALANGKAW NA TARIFA SA KURYENTE: MNWD dai pa sarado sa paggamit solar power

Dai pa sarado an manijamiento kan Metropolitan Naga Water District (MNWD) sa plano na maggamit nin solar power kun magpaparalangkaw an tarifa sa kuryente kan Camarines Sur II Electric Cooperative (Casureco II) Inc. na posibleng magdugang naman sa sunod na bulan nin Hunyo.


Si Jesus Salvador ‘'Choppy’’ Dela Cruz, opisyal na parataram kan water district nagpahayag kaini kasunod kan paglangkaw naman sa tarifa sa kuryente ngunian na Mayo 2024 asin dai hinahale kan cooperativa nin electricidad na igua naman sunod na dagdag tarifa.


Kan mga nakaaging bulan sa miting kan mga opisyales sa water district sa Camarines Sur kabale sa natukar iyo an posibleng maggamit sinda nin solar power sa tahaw kan pagparalangkaw kan tarifa sa kuryente.


Liwat naman nangyari an pig-iimponer na halangkaw na tarifa an Casureco II sa dahilan kan nagparalangkaw pa an presyo kan kuryente na saindang binabakal sa mga power suppliers.


Minate kan MNWD an halangkaw na tarifa, sinabi kaidto ni General Manager Florencio Mongoso Jr. na nagdoble an saindang binabayadan sa electric bill kan 2023, lampas sa P11.00 cada kilowatt alagad ngunian nagsakat na naman sa P10.75 sa residential, P9.88 sa low voltage asin P9.04 sa high voltage alagad posibleng maglangkaw ngunian na Hunyo 2024 sabi sa inpormasyon hale sa manijamiento kan Casureco II.


Maabot na sa 60 mil an consumedores kan water district kan ciudad na sakop an mga banwaan kan Magarao, Canaman, Camaligan, Gainza asin Ciudad nin Naga.

Kommentare


bottom of page