HULI SA HALANGKAW NA TARIFA SA KURYENTE: Water districts sa CSur mabalyo sa solar power
Nagkapera nang water districts sa Camarines Sur an plano nang maggamit nin solar power nganing makatipid sa halangkaw na tarifa nin kuryente kan duwang cooperativa nin electricidad na iyo an Casureco I asin II.
Sinabi sa Bicol Mail ni General Manager Cesar Federizon kan Pasacao Water District (PAWADI), Pasacao, Camarines Sur na dakulang epekto sa dalagan pinansyal kan saindang water district an halangkaw na tarifa sa saindang lugar na sakop kan Casureco I. Si dating monthly bill na nag-aabot sana sa P70,000 alagad sa ngunian sobra na sa doble na nagsakat na sa P150,000.
Bako lang PAWADI an nagpa-plano maging iba pang water district arog kan Calabanga Water District (CAWADI) sa Calabanga, Camarines Sur na nag-testing na kan saindang solar power.
Igwa mga proyecto na dapat ma-implementar an PAWADI alagad dai tolos makahiro an manijamiento mantang ribo-ribo nang nahuhugot na fondo sa sainda binabayad sana sa electric bill.
Igwa nang inisyal na pag-uurolay an ibang mga general manager kan water districts maging si GM Florencio Mongoso Jr. kan Metropolitan Naga Water District (MNWD) kabali naman sa saindang grupo sa ginibong miting sa Calabanga, Camarines Sur, sabi pa.
Si Mongoso nagpahayag sa media na naglangkaw man nin 50 por ciento an saindang electric bill cada bulan hali sa dating nasa P4.500 milyones alagad sa ngunian nagsakat na sa P9 milyones.
Saindang plano na an mga pumping station riribayan na nin solar power envez sa cooperativa nin electricidad.
Dinagdag pa kan GM kan PAWADI na saiyang hehelingon an pig-testing na solar power sa CAWADI nganing maaraman kun pera an gagastuson.
Si dating tarifa kan duwang cooperativa nin electricidad nag-aabot sana sa P9.00 cada kilowatt hour alagad sa ngunian na labi na sa nagdoble inabot na nin P17.00 cada kilowatt hour.
An paliwanag kan mga cooperativa nin electricidad iyo an halangkaw na generation cost na saindang binabakal sa mga power supplier, naglangkaw an presyo sa produkto nin petrolyo huli kan padagos na giyera kan Ukraine asin Russia. (dpa)