HULI SA KOMENTO SA FB VS BINADIL NA MAG-INA SA TARLAC: COP pinapahale kan alcalde

Sisipaon na sa Municipal Police Station kan Bato, Catanduanes an PNP Chief of Police digdi nin huli kan ginibong pag-post sa Facebook account kaini nin mga negativong komento sa mag-ina na pinagbabadil gadan sa Paniqui, Tarlac ni P/SMS Jonel Nuezca.


Si Alcalde Juan Rodulfo kan municipalidad kan Bato nagkumfirmar sa Bicol Mail na nagsurat na siya kan Deciembre 21, 2020 ki Catanduanes Provincial Director Col. Bryan Del Castillo na magdestino na nin bagong jefe de pulisiya sa saindang MPS nganing sipaon na sa puesto si Chief of Police Capt. Ariel Ruego Buraga mantang dai bagay sa saindang banwaan sagcod na inuuran na nin mga negativong komento kan mga residente maging hale pa sa ibang lugar.


Nakaabot na sa kaaraman ni Buraga na paparibayan na siya sa puesto alagad nagpaliwanag ki Alcalde Rodulfo na bako man intensyon sa saiyang pig-post sa FB account na ratakan pa an duwang biktimang mag-ina.


Nagpa-aram na an COP sa alcalde na mapatos-patos na siya kan mga personal na gamit sa MPS mientras na naghahalat kan relieved order.


Ipinahayag kan alcalde na nakaka-disturbo an saindang jefe de pulisiya matapos i-post sa saiyang FB account na binabasol pa an binadil na ina huli sa kawaran respeto sa policeman kaya napiritan na badilon an duwang biktima na sinda Sonya Gregorio, 52 asin an aki kaini na si Frank Anthony Gregorio, 21.


Pigrerespeto ko an deretso sa public pronouncement o personal opinion sa nangyaring pang-gagadan dapat maging malikay sa pagbutas nin ano man na negativong komento mantang siya an jefe de pulisiya kan LGU Bato, sabi pa ni Rodulfo.


Sa saiyang surat naka-attached an pig-post sa FB account ‘‘My Father is a Policeeeee Mannnnn!!! I don’t care eh eh eh eh eh err!!! P@Vng ina mo gusto mo tapusin na kita ngayon???? Bang Bang Bang Bang. Lesson learn kahit puti na ang buhok o ubanin na tayo eh matuto tayo rumispeto sa ating mga kapulisan.. mahirap kalaban ang Pagtitimpi at pagpapasensya.. RIP Nanay and Totoy’’.


Sa Camp Semion Ola, sinabi ni P/Major Malou Calubaquib opisyal na parataram kan PNP Bicol na stressed sinda kan maheling an video. An kaggibong pulis dai bagay magkapot badil.


Dai ma-ako ako kan Bicol PNP bakong makatawo an ginibong pambabadil gadan apesar na mayong kalaban-laban an mag-ina asin dapat dai ginamit an armas mayo man homa sa saiya, sabi pa.


Viral sa social media an makangerat na krimen na naging ugat kan dai pagkaka-intindihan asin discusyon iyo an ‘‘boga’’ ni Frank Anthony.


Si Nuezca naka-destino sa Parañaque City Crime Laboratory Unit asin nag-eestar sa Brgy. Cabayaosonan, Paniqui.


Siya nag-aatubang na nin double murder case sa RTC Branch 67 sa Paniqui, Tarlac. (DPAureus)