HULI SA MANDANAS RULING: P5.32-B 2022 budget kan CSur pinakadakula sa Bicol

Pili, Camarines Sur --- Nakatabang sa mga LGUs an Mandanas ruling nganing magdakula an saindang 2022 annual budget asin prueba kaini an approved budget sa Camarines Sur para sa sunod na taon iyo na an pinakadakula sa rehiyon Bicol na nagcacantidad P5.32 bilyon.


Si Vocal Romulo Hernandez, vice chairman kan Committee on Finance and Appropriation sa junta provincial kan Camarines Sur nagsabi an saindang marerecibing National Tax Allocation (NTA) dating internal revenue allotment igwa nang total na P1.45 bilyon na iyo an nakadagdag sa 2022 annual budget kan provincia.


Sa 2022 annual budget an 40 por ciento kaini madalagan sa salary and wages sa mga empleados asin opisyales kan Capitolio Provincial asin kabale sa tinagamahan fondo iyo an coronavirus disease (Covid- 19) response na igwang cantidad P190 milyon.


Sa sesyon regular kan junta provincial kan Miercules, Oktubre 20, 2021 inaprubaran an executive budget hale sa opisina ni Gobernador Migz Villafuerte alagad pigcontra kan limang miembros kan junta provincial.


Kabale sa isyu na pigpuntohan kan oposisyon na pinangenotan ni Vocal Emmanuel Llaguno kan Partido distrito iyo an ginibong taktika kan kaalyado kan mga kaalyadong vocal kan gobernador na kun kasuarin aaprubaran saka sana pigtawan kan 55 pages kan proposed budget na dai ninda maserne tolos mientras na dejado sinda sa numero.


Hinapot ni Llaguno si Vocal James Jaucian, pamayo kan appropriation committee kun saen napapadalagan an P600-M yearly rental kan Supper land alagad pigtutukdo an tesurero provincial.


Maging man si mga koleksyon sa buwis sa propriead real asin iba pang nakukuang ingreso kan provincial bakong malinaw an paliwanag sagcod na napiritan na paagihon sa division of the house.


Si Vocal Nelson Julia, nagcucuestion man kun ta’no ta P6 milyon sana an koleksyon sa mga quarry operations.


Pigtulod man ni Vocal Trexie Clemente-Maquiling na dapat tawan nin mga incentivo an mga frontliners sa mga district hospital asin iba pang biyaya. Dai man ini pigtawan prioridad kan appropriation committee.


An mga nagboto pabor sinda, James Jaucian, Romulo Hernandez, Angel Naval, Russel Pala, ex-officio member PCL Bengua, ex-officio member Liga President Lardo, Wilfredo Oliva, asin Emmanuel Oliva.


An mga nagboto contra sinda, Emmanuel Llaguno, Gerald Pilapil, Nelson Julian, Trexie Clemente-Maquiling asin Ruperto Alfelor. (dpa)