HULI SA MAULYAS NA HUSTISYA: Casong paggadan ki Bandojo ma-tolong taon nang bukas

Ni Paulo Papa

Dismayado an manihamento kan Camarines Sur National High School sa ciudad nin Naga dahil sa mabublay na progreso kan kasong panggagadan sa estudyanteng si Roselle Bandojo, 17-anyos na residente kan Kalye Acacia, Barangay Peñafrancia.

Alagad naglalaom si Sulpicio Alferez III, an principal kan nasambit na eskwelahan, na maparikas logod an pagbasa kan Department of Justice (DOJ) sa motion for review na pigsunad kan National Bureau of Investigation (NBI) – iyan sa tabang kan Volunteers Against Crime and Corruption (VACC).

Marurumdoman, mga huring parte kan Julio 2023, kan maibareta an pagkawara kan daragita pakalihis sana kaining magbakal nin pagkakan sa sarong tindahan sa Peñafrancia Ave., parehong barangay, antes na ini madiskubreng gadan asin nalalapa sa sarong madoot na bakanteng lote sa kanto kan nasambit na kalye alagad sakop nak an Barangay Liboton, parehong ciudad kan Junio 28, 2023.

Kan Agosto 25, 2023 pormalmenteng pigsunad sa City Prosecutor’s Office kan NBI kaiba an Naga City Police Office asin pamilya kan biktima an reklamong robbery asin homicide laban ki Enzo Purisima, kaidto 23-anyos na Soltero, parapadiyak kan Molave St., Barangay Liboton, ciudad nin Naga.

Mantang pigsusurat an baretang ini, nahahampang si Purisima dahil sa paglapas sa RA 9165 o Comprehensive Dangerous Drugs Act of 2002 kasunod kan pagkakaarestar saiya durante kan sarong buy-bust operation na pigkonduser kan mga autoridad sa Barangay Peñafrancia.

Dae pa maidoon si Purisima sa reklamong pigsunad laban saiya dahil sa kawaran nin bastanteng ebidensiya na nagpapatotoo sa akusasyon laban digdi – mala ngani pigbasura baga kan piskaliya an reklamo.

Julio 23, 2025 pigmarkahan kan mga Bandojo an ikaduwang taon na anibersariyo kan kagadanan kan biktima alagad mayo pang kasimbagan hale sa departamento katakod kan mosyon na pigsumetir kan bureau.

Junio 1, ngonian na taon, pigheras ni Abogado Caloy Cortez Jr., kan VACC an saiyang pag asestir siring man kan organisasyon sa pamilya ni Roselle tanganing mahidale an pag-adal kan DOJ sa mosyon.

Tolos man na naglapigot an Bicol Mail tanganing makaolay lamang ni saro sa mga partidaryos kan biktima alagad sarado an residensya kan mga Bandojo sa Barangay Peñafrancia.

Kan makaolay si Alferez napag-araman na haloy nang pigsusubaybayan kan CamHigh an dalagan kan kaso lagad nagin maluya an progreso.

Makamondo, susug pa sa prinsipal, an kawaran pa nin resulta kan mosyon – ma tolong taon na an nakakaagi pakalihis an panggagadan sa biktima.

Naglalaom si Alferez na maitao na an maulyas na hustisya para sa namaaram na hayskulana.