Human rights day pigkumemorar sa CSur

Kan Deciembre 1, 2021 iyo an pagkumemorar kan ika-73 na aniversaryo kan Universal Declaration of Human Rights alagad an human rights advocate sa Camarines Sur nagpahayag kan saindang pagkundenar sa administrasyon Duterte sa tahaw kan padagos na paglangkaw kan deretso humano sa provincia.

An Karapatan Camarines Sur asin iba pang mga progresibong grupo nagkaigwa kan saindang actividad sa paagi kan ginibong protest rally sa Plaza Rizal sa centro kan Ciudad nin Naga na participado kan maabot sa sarong ribong mga nagdedenuncia sa mga nangyayaring pagbalga sa deretso pantawo.

Bitbit an mga placard asin tarpaulin na nagdedenuncia kan mga nabibiktima sa mga extra judicial killing, illegal arrest and detention, paghahagad justicia sa mga political prisoners na sagcod sa ngunian yaon pa sa carcel, red tagging, cyber bullying maging paglaban sa kurapsyon.

Si Nida Barcenas, Secretary General kan Karapatan CamSur nagpahayag base sa saindang dokumentasyon sa mga caso sa human rights violation sa panahon ni Duterte puon kan Hulyo 2016 hasta Deciembre 1, 2021 igwa nang total na casong 2,104.

Sa saindang press statement sinabi na nakadagdag pa sa mga caso sa deretsong pagtawo iyo an nagpapadagos na ‘‘War on Drugs’’ asin ‘‘War on Terror’’. Nangyayari an mahiwas na pang-aaresto sagcod na resulta sa pagbalga sa deretso humano asin naglalaba pa an listahan kan mga biktima sa EJK o Extra Judicial Killing.

Sinabi pa na si mga pinagdududahan na nagsusuporta sa makawalang grupo kinakasohan nin mga gibo-gibo caso kriminal, mantang igwang insidente sa pag-aresto dagos nang binabadil gadan huli sa ‘‘nanlaban’’.

Sainda pang pigbuyagyag sa ‘‘press statement’’ afuera kan mga gibo-gibo caso, tinatanuman nin mga ebidensya arog kan badil, bala asin explosibo.

Segun pa Karapatan igwang mga insidenteng abalahon an proceso kan caso mantang nalalaom sa carcel an mga inosenteng biktima inaabot nin taonan an asunto huli ta dai tolos na-eskedyul kan mga vista sa corte. Sa arog kaining, sistema mas nahahaloy sinda sa carcel naiipit an saindang deretso para sa ‘‘fair and impartial trial’’.