‘’I WILL FIGHT’’ Papin andam maglabansa cargong gobernador

Mapapalaban si Bise Gobernador Imelda Papin sa cargong gobernador sa Camarines Sur sa tahaw kan nagkapera nang grupo nin kababaehan asin iba pang organisasyon an masuporta sa saiya kun maglaban sa mas halangkaw na posisyon sa Capitolio Provincial.

‘‘I will fight’’ kun igwa nang naghihiro asin boses na kan mga taga Camarines Sur an nag-mamawot na magkaigwa naman nin bagong liderato an provincia, sabi ni Papin.

Sa retrato pinapaheling kaini na nakagugom an tuong kamot na laban sa eleksyon kun iyo an kamawotan kan tawo.

Alagad saiyang piglinaw na mayo pa siyang pinal na desisyon.

Sa saiyang ‘‘bukas na urulay sa politica’’ sa atubangan kan miembros kan media, sinabi kan bise gobernador sa ngunian marhay an saindang iribanan sa trabajo sa Capitolyo Provincial ni Gobernador Migz Villafuerte asin saiyang suporta an pagpadalagan kan joven na gobernador.

Kun nagkukusog an voces kan namamanuan sa Camarines Sur pabor sa saiyang paglaban sa provincia ano ta dai ko magtindog nganing magcandidatong gobernador.

Dai palang nahahaloy sa sarong entrevista sa media, sinabi ni dating Congresista asin Majority Floor leader Nonoy Andaya kan Anduyog Party na saindang susuportaran si Papin kun interesado na maglaban sa cargong goberndor kun dai nang kasegurohan si Bise Presidente Leni Robredo na magdalagan sa Camarines Sur bilang gobernador.

Kun iyo an kagustohan kan namamanuan kan Camarines Sur an saiyang magiging ka-tandem hale sa Libmanan o Calabanga na dai paman nginaranan.

Si VP Robredo nagkapera nang veces nagpahayag sa media na makumfirmar siya kun ano an saiyang dadalaganan sa lokal o nasyon sa Septiembre o antes kan Oktubre 1 hasta 8 na iyo an panahon kan pagsangat nin certificado de candidatura sa Comelec sa mga candidato lokal asin nasyonal.

Alagad sa ngunian madiklom pa an paglaom kan Anduyog Party sa VP na magdalagan sa provincia sa maabot na eleksyon sa Mayo 9, 2022.

Duwang bulan nalang antes kan pagsangat nin COC sa Comelec, si Provincial Administrator Louige Villafuerte iyo pa sana an kumfirmadong macandidatong gobernador karibay ni Gob Villafuerte na madalagan bilang congresista kan Rinconada district. (dpa)