IBANG OPISYAL KAN BARANGAY ENVUELTO SA DROGA-PDEA: Nagtuturog na BADAC dapatmag-activo liwat vs droga

Tanganing paurogon an kampanya sa mga barangay laban sa operasyon kan ilegal na droga dapat magin aktibo liwat an nagtuturog na Barangay Anti-Drug Abuse Council (BADAC).

An dating pamayo kan Liga ng mga Barangay asin regular na miembro kan Sangguniang Panlungsod sa Ciudad nin Naga, Consejal Vidal Castillo nagpahayag kaini kasunod kan sahot kan Philippine Drug Enforcement Agency (PDEA) sa Camarines Sur na igwang opisyales de barangay na posibleng envuelto sa ilegal na droga.

Si Provincial Director Mark Anthony Viray kan PDEA Camarines Sur nagpahayag sa entrevista kan media na igwang mga impormasyon na an ibang opisyal kan barangay envuelto sa ilegal na actividad. Alagad dai man siya nag-ngaran asin kun anong barangay mantang nagpapadagos kan saindang ‘‘validation’’.

Sinabi pa ni Castillo kan siya Punong Barangay kan Calauag kan ciudad activo an BADAC na pig-organisar sa 27 barangay kan ciudad kan panahon ni dipuntong Alcalde Jesse M. Robredo mientras nagpadagos na activo kan panahon ni dating Alcalde John Bongat.

Dapat mag-aksyon an DILG kun igwang opisyales de barangay na naggagamit o nagtutulak nin droga, sabi pa kan consejal.

Kan mga nakaaging bulan sa mga ginigibong surprisang drug test sa barangay igwang nasisikop na Brgy. Tanod na positivo sa droga.

Hagad ni Castillo sa mga punong barangay na ipadagos an mga drug testing alagad dapat sinda mangenotan kun desidido sa kampanya laban sa droga.

Saludo an consejal ki City Director Col. Erwin Rebellion kan Naga City Police Office asin PDEA sa maigot na kampanya sa droga mala ngani dakul naman an nagkakadarakop na milyones pesos pa an cantidad kan droga.

Sa ngunian nagbubutwa naman na activo an operasyon kan bantugan sa droga na Isla Sison o Sitio Sagrada Familia sa Barangay Peñafrancia kan ciudad.

Bako lang sa Ciudad nin Naga igwang grupo kan BADAC envez sa enterong mga barangay mantang mandato ini kan DILG sa Barangay Council na dapat mag-organisar kan grupo laban sa droga.