Iconic Capitol project suportado kan SB Pili

Sa tahaw kan nangyayaring kontrobersiya sa ipapatindog na Iconic Capitol kan Camarines Sur mantang maabot sa sangatos na hektaryang kaomahan maaapektuhan, alagad an Sangguniang Bayan kan Pili, Camarines Sur nagpasar nin resolusyon nganing suportaran an proyekto ni Gobernador Migz Villafuerte.

Pinangenutan ni Bise Alcalde Vicvic Solano, presiding officer asin mayoriang miembros kan SP an nanindugan na dapat suportaran an dakulang proyekto mantang ini pambihirang proyekto kan provincia asin makakatabang pa sa turismo mantang iyo na an kinokunsiderar na pinakamagayon na capitolio sa nasyon.

Pambihira an desinyo na mayo digdi sa Kabikolan maging sa ibang lugar sa Filipinas kabale sa mga punto kan mayoriang miembros kan SB.

Igwa nang inisyal na P500 milyon na fondo hale sa Department of Public Works and Highways (DPWH) Bicol na iyo an ma-implementar.

An grupo nin paraoma nagpahayag na dai sinda contra sa proyekto alagad bako sa lugar na ‘‘irrigated’’ na digdi nabubuhay an pobreng mga paraoma perang decada na digdi sinda nabubuhay.

Dai nagboto pabor sa resolusyon sinda Consejal Narcel Lopez asin Francis Belen sa dahilan na dapat mag-agi muna sa committee level.

Segun pa ki Lopez dapat maaraman muna an land area kan edificio asin tano ta sangatos hektaryang gayo an ookuparon na maliligis an hanap buhay kan tios na mga paraoma asin irrigated an kaomahan.

Igwa nang na-expropriate na kaomahan an capitolio mantang an iba pendiente pa an sinangatan na expropriation case.

Sinda Belen asin Lopez nagsabi pa tano ta dai gamiton si dating lugar kan lomang edificio kan capitolio nganing dai maapektuhan an hanap buhay kan mga paraoma. (dpa)