Ihapot Ki Attorney

By Atty. Paolo Carlo C. Tolentino

Nakabangga si nagsubling awto

Atty., may nagsubli sakong awto na rehistrado sa pangaran ko. Kan gamit ini kan nag subli, naka-bangga siya. Nagka damage su nabangga niyang awto tapos nalugadan pa ang driver. Base sa police report, itong nagsubli sako ang may sala. Posible ba akong pabayadon o panaguton sa nangyari?

Mike B

———

Pwede kang pabayadon sa damage bilang ika ang rehistradong may sadiri kan awto. Iyo ni ang inaapod na “registered owner rule”. Kung sisay ang nakarehistrong may sadiri kan awto siya ang responsable sa ibang tao o sa publiko sa damage na nagibo sainda dahil sa pag-gamit kang awtong ini dawa bako ang may sadiri mismo ang nagmamaneho kan awto kan nangyari ang insidente. Ang katuyuhan kang rule na ini ay para protektahan ang biktima kan insidente. Pwde niya pagbasehan ang rekords kang LTO kung sisay may sadiri kan awto na pwde niya panaguton sa nangyari.

Kung may mga kahaputan, mag email sa: ihapotkiattorney@gmail.com