Ihapot Ki Attorney

Atty. Paolo Tolentino

Pananagutan kan seller sa depektibong sasakyan

Atty., nag-loan po ako para sa downpayment kan mga sasakyan asin tolos ko tinao an ₱500,000 sa seller. Base po sa napagkasunduan mi, kukuahon ko an tulo (3) na units paagi sa financing.

Kan kinua ko po an mga units, nagluwas po na depektibo an kada saro. An enot po may raot sa makina asin transmission kaya kaipohan ibalik. An ikaduwa po may problema man sa makina, asin sinabihan ako na papalitan daa an mga piyesa, kaya nagdagdag pa ako nin ₱30,000. Pagtapos kaini, sinubukan gamiton an enot na unit, pero dai man nagamit nin maayos ta dai tugma an transmission. An ikatulong unit mas grabe pa an raot asin halos dai na magamit.

Sa huri, naibalik ko na po gabos an mga units, pero habo na po ibalik kan seller an ₱500,000 na downpayment, ta sinasabi niyang nagastos na daa niya ini sa pagpapaayos kan mga sasakyan. Sa arog kaining sitwasyon, Atty., pano ko po mababawi an downpayment ko?

---

An kasunduan nindo may kinalaman sa bilihan nin sasakyan. Dai klaro kun ini contract to sell pa sana o contract of sale na, o kun nakasurat asin pirmado an kasunduan nindo. Sa ilalim kan batas, may obligasyon an seller na siguraduhon na an pigbebenta niya mayong nakatagong depekto asin magagamit nin tama kan buyer base sa tunay kaining gamit. Kun dai niya ini nasunod, arog kan nangyari saimo, may pananagutan siya.

Bilang buyer na dai nagamit nin maayos an mga sasakyan, puwede mong ipawarang bisa (i-rescind) an kontrata, ibalik an mga sasakyan, asin bawi-on an kwarta na naibayad mo bilang downpayment. Obligasyon kan seller na ibalik ini. Para maging pormal an pag-rescind mo kan kontrata, padarhan mo siya nin surat na nagsasabing kinacancel mo an kontrata dahil dai niya nasunod an kasunduan nindo, asin mag-demand ka man na ibalik an kwarta sa laog nin nakatakdang aldaw.

Kun dai niya sundon an demand letter, puwede kang magsampa nin kaso sa korte laban saiya. Depende sa detalye kan nangyari, puwede ini maging civil case para mabawi an kwarta, o criminal case na estafa kun may panlilinlang na nangyari.

Kung may mga kahaputan, mag email sa ihapotkiattorney@gmail.com.