Ihapot Ki Attorney

Atty. Paolo Tolentino

Itinatago si aki kang ka live-in

Attorney,

Ako po si Ramon. Igwa kaming aki kan sakong ka live-in partner. Ako po nagagastos kang gabos na pangangaipo kan aki mi. Pakatapos ko po makisuhayan saiya, dai niya na pinapahiling sako ang aki mi—naglipat istaran, nagpalit number, asin tigblock ako sa facebook.

Ano po an pwede kong gibohon tanganing dai niya ako maharangan na mahiling ang aki mi?

Salamat po.

---

Kung ang live-in partner mo ay single o mayo agom, ang aki na iyan ay tinuturing sa batas na talagang aki nindo pero “illegitimate” ini dahil dae kamo kasal. Pero kung may agom ang live-in partner mo, sa batas ang gabos na aki na ipinangaki niya ay ituturing na aki nindang mag-agom dawa sa totoo ang saro duman ay aki mo.

Ang parental authority saka kustodiya kan sarong illegitimate na aki lalo na kung murang edad pa ay tinatao kang batas sa ina. Pero dahil ika ang ama, lalo na kung nakarehistro ang pangaran mo sa birth certificate kan aki na ika ang ama niya, igwa ka man karapatan na mahiling, makaiba saka mabisita siya.

Kung tinatago na saimo ang aki kang ina niya, o habo na ipahiling o makaiba mo ini, pwde ka magsampa ning kaso sa husgado laban sa ina para matawan ka ning “visitation rights” o okasyon o panahon na makaiba mo ang aki. Ang korte ang masugo o matao direktiba sa ina na ipahiling ang aki o ipabisita niya ini saimo.

Kung may mga kahaputan, mag email sa: ihapotkiattorney@gmail.com