Ihapot Ki Attorney

Atty. Paolo Tolentino

Nawalat na utang kan magurang, pano mabayadan?

Hi Attorney,

Kakagadan lang po kan sakong magurang, asin may mga utang po sinda sa bangko asin iba pang loans. Saro po ako sa tagapagmana kan saindang properties, arog kan harong asin lote. Pwede po bang kuahon kan mga creditor an sakong minana na property para bayaran an utang kan sakong magurang, o protektado ini ta ako na ang may sadiri? Salamat po.

Concerned Heir

---

Pwde tabi iyan. Bilang heir o tagapag-mana, may parte o karapatan ka sa inaapod na “estate” o kabuuhan kan mga pagsadiri na winalat kan saindong magurang. Ang dae bayad na utang na winalat kang magurang nindo bako nindong personal na obligasyon pero pwde ini ibawas sa estate kan magurang nindo. Ang tada matapos ang pagbayad kan mga obligasyones kan magurang nindo, iyo iyan ang mapapaduman saindo.

Patas o tama lang ang batas na ini. Kung mayo ka minana sa magurang mo, dae ka pwde pabayadon sa nawalat niyang utang. Pero kung igwa man siya winalat, dapat ibawas o bayadan muna ang mga utang o obligasyones niya hali sa winalat niyang mga pagsadiri. Kung may tada, iyan ang mapapaduman saindo. Kung ang utang mas dakula sa halaga kan winalat na pagsadiri, dae kamo pwdeng personal na pabayadon sa utang sobra duman sa halaga kan pagsadiri na winalat kang magurang nindo.

Kung may mga kahaputan, mag email sa: ihapotkiattorney@gmail.com