Ihapot Ki Attorney

Atty. Paolo Tolentino

Nakagat kan ido kan kapitbahay

Atty., kung nakagat ako kan nakadulag na ido kan kapitbahay, ano po an sakong legal rights asin ano ang obligasyon kan kapitbahay. Pwde ko po ba sindang pagastuson sa bakuna o darahon sa barangay an kaso?

---

Kung nagkaigwa kang danyos dara kan paka-kagat saimo kang ido, pwde pabayadon ang kapitbahay mo na may sadiri o posesyon kan ido na nagkagat saimo. Kaiba sa posibleng danyos na ini ang nagasto mo sa hospital o bayad sa doktor, bulong, o pagpabakuna laban sa rabies.

Yaon sa satong Civil Code na ang may posesyon kan sarong hayop, arog kan ido, ay obligado bayadan ang danyos na dara o gibo kan hayop na ini, dawa nakadulag. Yaon man sa Anti Rabies Law na ang may sadiri kang ido obligadong kontrolon o dae pabayaan na magluwas o maglakaw ang ido sa pampublikong lugar na mayong gakod. Nilaag man sa batas na ini ang responsibilidad kang may sadiri na tabangan ang sisay man na nakagat kang ido niya saka saguton niya ang gastong medikal dara kang pakakagat.

Pwde kang mag-reklamo muna sa barangay para pag-orolayan ang nangyari saka ang saimong hinahagad, saka preparasyon na man ini kung mag-abot sa oras na masampa ka ning kaso sa korte.

Kung may mga kahaputan, mag email sa: ihapotkiattorney@gmail.com