Ihapot Ki Attorney

Atty. Paolo Tolentino

Pinabakal kan tugang an daga na pamana sa gabos

Atty., mayo na po an mga magurang mi, pero nadiskubre mi na ipinabakal pala kan saro ming tugang an daga na pamana samuya gabos. Mahahabol mi pa po ba ini? Salamat po sa simbag.

---

Iyo mahahabol pa nindo ang parte kang daga na para saindo. Kang pinamana ang buong daga kang magurang nindo saindo gabos, kamong magturugang naging mga may sadiri o “co-owner” kang daga na ini sa kagabusan saka sa kada parte o porsyon kaini. Kung dae pa ini nababanga o na-partition base sa orolay nindo o desisyon kan korte, gabos kamo may karapatan sa daga saka mayo sarong tugang na makakasabi na siya sana ang may sadiri kang sarong parte o porsyon kang kabuohang daga.

Ang pagpabakal kang tugang nindo kang buong daga na mayo pagtugot o partisipasyon nindo magiging epektibo o tama duman sana sa parte niya. Itong parte na para saindong ibang mga magturugang mayo epekto duman ang pagpabakal kang tugang nindo. Gusto sabihon, sa parte na ini, may karapatan pa kamo saka dae naging may sadiri igdi itong nagbakal o “buyer”. Naging may sadiri ang “buyer” duman lang sa parte o porsyon na para sa nagpabakal nindong tugang. Halimbawa apat kamong magturugang, ang parte kang tugang nindo nagpabakal sa buong daga ay ¼ lang, iyo man ini ang porsyon na napaduman sa “buyer”. Para mabawi nindo ang parte nindo, pwde kamo magsampa ning kaso sa korte para i-partition ang buong daga.

Kung may mga kahaputan, mag email sa: ihapotkiattorney@gmail.com