Ika-249ng Pintakasi kan Goa mas pinalawig, pinabongga
- Jun 19
- 2 min read
Ni Sonny Malate
Goa, Camarines Sur --- Orug na pinalawig asin pinabongga an mga actividades para sa Pintakasi ngonian na taon kan banwaan na ini bilang pagtaong onra ki San Juan Bautista, Santo Patron kan Parroquia.
May temang "Orgulyo Kan Goa! Taga Goa Kita, Gabos Kaayon, Gabos Kita May Gigibohon!", an Ika-249ng fiesta kan Parroquia pigbukasan kasabay kan Aldaw nin Katalingkasan kan Junio 12 asin matatapos sa Junio 24.
An okasyon sarong maogmang celebrasyon kan cultura, pagtubod, unidad asin iba-ibang aspeto kan pagbuhay na pinagsaro kan espiritu nin comunidad bilang Goaeño na nag-eerok sa pinakaprogresibong banwa sa Partido Area.
An celebrasyon ngonian na taon primero sa termino ni Alkaldesa Raquel S. Lim. Ini nasa pagmanehar kan Municipal Tourism Office sa pamamayo ni Sheila Orlina Belleza. Katabang pa man iyo an Sanggunuang Bayan sa liderato ni Bise Alkalde Marcel Michael P. Pan.
Suportado man ini kan Oficina kan Alkaldesa mismo, Simbahan Catolica, iine agencies, oficiales de barangay, academe, negociantes, hubenes asin iba-ibang sector kan comunidad.
Kairiba sa mga makolor, bibo asin makahulogan na actividades iyo an San Juan Bazaar, Takbo Laban sa Droga na pig-initiar kan Goa Municipal Police Station, Job Fair asin Mardi Gras.
Kan Junio 17 piglansar man an Tinoktok Con Galyang, an declaradong "One Town, One Product" kan Goa sa irarom kan Department of Trade and industry (DTI).
Nakalinyada pa man an Art Workshop asin Art Exhibit, Bicol Fashionista, Kadiwa ng Pangulo, Harubay ki San Juan Bautista Street Dance Competition, celebrasyon kan anibersaryo kan Goa Community College, Grand Zumba Dance Fitness Competition asin iba pa.
An Harubay ki San Juan Bautista Street Dance Competition sarong initiativa kan Parroquia sa paagi ni Padre Jomar B. de Hitta, Cura Parroco. Suportado pa man kan Parroquia an San Juan Bazaar.
Sa segunda dia kan kafiestahan, gigibohon an Governor's Night bilang pakikisumaro ni Gov. Luis Raymund F. Villafuerte sa mga Goaeño. An okasyon tatampokan nin mga bibong musica asin baraylehan.
Nanotaran ni Alkaldesa Lim na dawa ngani limitado an fundo na pig-alocar kan Sanggunuang Bayan, may mga grupo asin individual man na nag-extendir nin tabang tanganing maging maogma, macolor asin bongga an kafiestahan kan banwa.
Arog kan sarong magayagaya asin may mahuyong boot na Ina kan banwa, nagpaabot nin maogmang pagbati sa kaaldawan kan kafiestahan si Alkaldesa Lim sa mga Goaeño.
Mientrastanto, pigbuyagyag kan Alkaldesa na nagconducir na kan bidding para sa access road asin tulay palaog sa Partido District Hospital na harani sa Goa Integrated Central Terminal.
Oras na magbukas na an servicio sa publico, piglalaoman na an hospital madara nin dakulang kahinggianan sa pangangaipo sa salud bako sana kan mga Goaeño kundi kan bilog na taga Partido Area.
Comments