Ilaw-ilaw sa Pasko sa Partido area liwat na nagliwanag

Ni Sonny Malate

Arog kan nakaaging mga taon, liwat na naman nagliwanag an mga ilaw-ilaw sa Pasko sa mga banwaan sa Partido Area katakod sa celebrasyon kan Kapaskohan.

Pinakaenot na nagkaigua kan lights-on ceremony kan pailaw iyo an banwaan kan Sagñay, kan Nobyembre 30, aldaw kan pintakasi kan santo patron kan banwa, Señor Andres de Apostol. An liwanag kan mga ilaw-ilaw sa centro kan banwa nagserbing dagdag kaogmahan sa mga nakisumaro sa kafiestahan kan banwa.

Sa banwaan kan Lagonoy, an switch-on  ceremony kan pailaw sa municipal plaza ginibo kan Deciembre 3, kasabay kan pagbukas kan Christmas Bazaar (Dito Laging Pasko) na pig-initiar kan DTI- Lagonoy Negosyo Center.

An Christmas Bazaar bukas magpoon alas cuatrong hapon hasta alas diez nin banggi. Mababakal digdi an mga pagkakan asin iba-ibang local na producto kan saradit na mga entrepreneur. Igua man dagdag kaalingan na musica sa paagi kan local singer na si Ched Valencia. 

Magigiromdoman na kan nakaagin  taon,  an pailaw sa banwaan kan San Jose sinabayan man kan Banchetto de San Jose, sarong night market na yaon an manlaenlaen na kakanon, musica, piyesa nin mga arte, on-the-spot tattoo asin iba pa.

An Banchetto de San Jose nahimo sa pagtatarabangan kan local na gobyerno sa pamamayo ni Alkalde Jerold B. Peña asin grupo nin mga negosyante digdi asin pagtaraid na banwa. 

Sa banwaan kan Goa, an atubangan kan edificio municipal an maliwanagon pagkabanggi magpoon kan Deciembre 5 huli sa kolor puting ilaw gikan sa labing sangribong mga burak kan artificial tulips harani sa higanteng Christmas tree digdi. Ini an piglalaoman na dadagsaon nin dakol na tawo kada banggi  mantang an Goa iyo an pinakacentro kan progreso sa Partido Area.

Sa switch-on ceremony, si Alkalde Alfredo P. Gonzaga III, an nakasalidang local na ehecutivo ki defuntong Alkalde Marcel S. Pan,  dakolaon an kaogmahan asin inspirasyon  sa liwanag kan pailaw na simbolo kan padagos na paglaom kan mga constituentes sa saiya bilang bagong ama kan banwaan.

Kan mga nagsunod na aldaw ginibo man an switch-on ceremony kan mga pailaw sa ibang banwaan sa Partido, kairiba na an nasa coastal area. An mga alkalde sa banwaan iyo an nangenot sa programang ginibo para digdi.

An mga ilaw-ilaw sa Pasko sa distrito kan Partido minadurar magpoon primerong semana kan Deciembre hasta sa enot na mga aldaw kan bagong taon. An switch-on ceremony an parating dinadagsa kan mga tawo mantang ini an nagseserbing senyal kan pagpoon kan Pasko sa banwa. 

Ini an prominenteng nakalatag sa plaza kan banwa o sa atubangan kan edificio municipal asin pigdadagsa kada banggi kan mga kaakian, hubenes asin kamagurangan.

Saro na ining tradisyon kaya padagos na piglalatag kan local na gobyerno. Iba-ibang kolor, manlaenlaen na adorno asin paiba-ibang tema. Ngonian na taon 2024 kun saen an Kabikolan inagihan nin mga makuring calamidad, ini an orug na makahulogan sa mga taga Partido. 

Ini nin huli ta an liwanag kan mga ilaw-ilaw nagsisimbolo asin nagdadara nin pagmate nin Kaogmahan,  Pagkasararo, Katuninongan  Paglaom asin Pagkaminootan  na pigmamawot kan  comunidad durante sa pagrokyaw kan  pagkamundag ni Hesukristo.

An pailaw sa Pasko sa banwaan nin Goa na dinadagsa kan mga residentes digdi asin ibang lugar. (Photo - LGU Goa)