IMO awardee bagong matukaw na RM kan NIA

Sarong Irrigation Management Office awardee an nakatalaan na magtukaw na bagong pamayo kan National Irrigation Administration sa Bicol na may opisina sa Panganiban Drive sa Ciudad nin Naga karibay ni Acting regional manager Engr. Diogemma Rodriguez.

An bagong pamayo kan NIA Bicol iyo si Engr. Lauro ‘‘Lari’’ E. Ballesteros na mainit na sinabat kan mga opisyales asin empleados kan ahencia kan pag-abot kaini sa Ciudad nin Naga kan oktubre 25.


Sinabi ni Ed Yu, opisyal na parataram kan NIA Bicol si Engr. Ballesteros iyo an masangli ki Engr. Rodriguez na iyo an nagtukaw na acting regional manager kan NIA Bicol kasunod kan pagkaka promote bilang bagong deputy administrative and finance sector kan opisina sentral ni Engr. Freddie Toquero, na naging pamayo kan NIA Region V sa laog nin duwang taon.


Tubong Cabanatuan City, Nueva Ecija si Ballesteros na igwang halawig na experiencia sa pagkapot kan Irrigation Management Office (IMO).


Segun sa mga naging kaibanan nin Engr. Ballesteros, saro siyang matibay na harigi kan rehiyon tres na dalan sa mga magayon asin pusog na proyekto katakod kan irrigation development sa sinambit na lugar.


Huli kaini, digdi nakua an award bilang best IMO of the year, national category sa ginibong selebrasyon kan ika-57 aniversayo kan ahencia.


Sinabi pa ni Yu sa masunod na bulan nin Noviembre gigibohon an formal na turn-over ceremony kan bagong regional manager kasabay kan pag-inagurar kan duwang dakulang proyekto sa Bicol na iyo an Agos Rubber Dam sa Bato, Camarines sur asin South Quinale Rubber Bladders sa Oas, Albay.