Inflation sa Bicol bulan-bulan naglalangkaw-PSA

Tolong bulan nang sunod-sunod an paglangkaw kan inflation sa rehiyon Bicol base sa pinapaluwas na datus kan Philippine Statistics Office (PSA).

Kan Deciembre 2022 nag-abot sa 7.2 percent sunod na bulan nin Enero 2023 nagsakat sa 8.3 percent asin kan nagtalikod na bulan nin Febrero 2023 nagparalangkaw an inflation rate abot sa 8.8 percent.

Apektado an ribo-ribong Bicolano alagad segun sa PSA an causa kaini iyo an padagos na paglangkaw sa presyo kan mga mayor na produkto sa mercado, halangkaw na tarifa sa tubig, tarifa sa kuryente mantang an petrolyo na nasa 11.9 por ciento kumpara sa 10.2 por ciento kan Enero 2023.

Bako lang mga produkto sa agricultura nagmahal an mga presyo (naka-inset sa ibaba) maging an mga delata sa mall asin mercado. (ERaureus)

Kabali pa an paglangkaw kan mga arkila sa apartment o harong, presyo kan gugulayon, gatas, sugok maging prutas.

Sa datus kan sinambit na ahencia sa Bicol, saro sa nagiging causa iyo paghiro kan inflation kan rehiyon Bicol an 9.3% halangkaw man na presyo kan mga alcoholic beverages asin produkto sa Tabaco, 9.45% mientras na sa clothing, 4.5% sa recreation, 7.1% sa mga restaurants asin accommodation services saka an personal care and services igwa man nin kontribusyon nin 6.5%.

Alagad dakulang bagay an halangkaw na suplay nin bagas sa Bicol dai kabali sa inflation dawa na ngani inagihan nin mga calamidad.

An sektor nin negosyante nagtutubod na an paglangkaw kan inflation sa rehiyon epekto pa kan nakaaging pandemya mantang sinda nasa ‘‘recovery period’’ pa sana.

Sa pinaluwas man kan PSA National Office sa ngunian sa unemployment rate igwang 2.37 milyon (4.8%) asin sa employment rate maabot sa 47.3 milyon (95.2%).

Mientrastanto an numero kan Child Labor sa Bicol, naglangkaw mala ngani si mga nag-eedad nang lima hasta sa 17 anyos. Segun pa sa PSA sa 2.08 milyon na mga aki sa sinambit na age group kan 2021, maabot sa 117,000 o 5.7 5 an nagtatrabajo. Halangkaw ini kumpara sa 4.9% na child labor kan taon 2020.

Base sa datus pitong menor de edad sa sangatos na mga aki sa bilog na nasyon an hali sa rehiyon.