Insurhencia matatapos na - Philippine Army

An 9th Infantry Division kan Philippine Army sa Bicol na may base sa Camp Elias Angeles, Pili, Camarines Sur nagpahayag na pawara na an problema sa insurhencia sa rehiyon huli kan mga sunod-sunod na nagsusuroko bitbit an saindang mga armas.


‘‘Malapit ng matapos an insurhensya’’ ini an prediccion kan 9th ID sa mga pahayag ni Army Spokesperson Capt. John Paul Belleza sa tahaw kan padagos nang nagsusuroko sa gobierno asin nagbabaraba kan saindang armas an mga rebeldeng New People’s Army.


Afuera kan mga naenot nagbaraba kan saindang armas, kan Deciembre 2020 maabot sa 111 an nagsuroko sa Masbate asin ngunian na bulan nin Enero igwa naman nin dugang na duwa sa kaparejong provincia.


Igwa nang naenot sa Sorsogon asin Camarines Sur asin natatabangan na kan gobierno sa livelihood, housing asin medical assistance asin cash, sabi pa ni Belleza.


Sinda natatabangan sa lindong kan mga programa asin dugang na benipisyo hale sa Regional Task Force to End Local Communist Armed Conflict (RTF-ELCAC).


An mga nagsurokong NPA an iba sa sainda mga suportadores, si may mga ranggo nagsuroko kan saindang armas asin sinda mga miembros kan Sangay ng Partido Lokalidad asin miembros kan Militantiang Bayan.


An 9th ID sa pamamayo ni Major General Henry Robinson Jr. nagsabi na an sunod-sunod na mga pagsuko kan rebeldeng NPA mawot na nindang mabuhay na matuninong asin saindang suportado an pangapudan kan gobierno para sa katrangkilohan kan comunidad.


Sinabi pa kan 9th ID na an pagresolber kan insurhensya sagcod na magsuroko sinda sa gobierno huli sa suporta kan comunidad asin mga lokal na gobierno.


Sa lado man kan Communist Party of the Philippine (CPP) sa saindang pinaluwas na press statement sa saindang ika-52 na aniversaryo kan kumunistang grupo na anas sanang propaganda an pinapaluwas kan militar na matutunaw na an saindang organisasyon.


Kan mga nakaaging pamayo kan 9th ID nagpaluwas naman nin press statement na madali nang matapos an insurhencia sa Bicol alagad liwat naman nagpahayag kan kaparejong prediccion.


Sa pahayag kan Romulo Jallores Command, sinabi kaini na ngunian na taon piglalaoman na mas makusog an saindang fuersa sa suporta kan masa asin iba pang grupo. (DPA)