IPs suportado kan LGU Tigaon

TIGAON, CAMARINES SUR--- Bilog an suportang pigtatao sa mga miembros kan Indigenous Peoples (IPs) sa banwaan na ini gikan sa local na gobierno sa pamamayo ni Alkaldesa Chiqui B. Fuentebella.

Segun ki Algene Pelo Panoy, pamayo kan Cultural Heritage, Events, Arts and Tourism Office of Tigaon, an alkaldesa nagtutubod na an sector kan mga IPs orug na nangangaipo kan atencion kan gobierno. 

An Tigaon iguang labing tres cientos na mga IPs na yaon sa pitong mga barangay kan banwaan. Ini kairiba sa mga Agta Tabangnon, Agta Isarog asin Remontados.

Durante sa pang local na celebrasyon kan IPs Day kan tuminalikod na bulan, an local government unit nag-extender nin Service Caravan para sa  mga IPs. Sa paagi kan Local Civil Registrar, nagconducir nin late registrarion of  births, pagparehistro sa pagpakasal asin pagproceso kan National ID. Ini piggibo sa pakikipagcoordinar sa mga chieftain kan mga IPs.

Dagdag pa ni Panoy, nakatabang man ninda an Rural Health Unit sa pagsimbag sa mga pangenot na pangangaipo sa salud kan mga IPs digdi.

Mientrastanto, pigbuyagyag ni Panoy na pig-aadalan na sa Sangguniang Bayan kan Tigaon an pagkakaigua nin Indigenous Peoples Mandatory Representative (IPMR) sa consejo digdi.

Segun sa pamayo kan Cultural Heritage, Events, Arts and Tourism Office of Tigaon, si Alkaldesa Fuentebella an nagtutulod sa esfuerzos na hanapan nin fundo para sa representante kan mga IPs sa local na consejo kan banwaan tanganing mahidale an pagrealizar kaini.

Manonotaran na sa banwaan nin Sagñay asin Goa,  enot nang nagkaiguang IPMR sa Sangguniang Bayan kun kaya igua nang voces an grupo kan mga IPs digdi sa pagtulod kan mga interest ninda.

Tanganing matawan nin kadagdagan na  atencion an sector kan IPs, an local na gobierno padagos na  nakikipagcoordinar sa National Commission for Indigenous Peoples (NCIP),  Department of Social Welfare and Development (DSWD), Department of Education (DepEd), Department of Health (DOH) asin iba pang ahencia.

Sa lado kan edukasyon, mismong si Alkaldesa Fuentebella nakipagtabangan sa DepEd Tigaon sa pamamayo ni Dr. Minnie Talaguit, Public Schools District Supervisor (PSDS), na luwayluway na maintroducir an cultura kan mga IPs sa mahiwas na comunidad. Ini parte kan saiyang kahurotan na maresulta sa positibong pananaw kan sociodad sa tribu kan mga IPs.

Sa paagi kan Special Program in the Arts (SPA) na gikan pa sa idea ni Congresista Arnulf Bryan B. Fuentebella na pigtatangkuros kan DepEd asin local na gobierno,  an local government unit kan Tigaon naglalaom nin mas progresibong kamurugtakan kan minoriang sector kan  IPs sa sociodad.

Si Alkaldesa Fuentebella sarong licensiadong educador asin may mahiwas na pagkanood asin pagmakulog sa situacion kan mga IPs sa lado nin edukasyon, salud asin iba pang servicio asin beneficio na maninigo sanang iduhol kan gobierno sa sainda.

IPs durante kan parada sa IPs Day sa Tigaon, Camarines Sur.