IRIWAL SA PROPRIEDAD SA NAGA: Pag-posisyon kan irederobase sa desisyon kan SC

Inangat ipaheling an titulo

‘‘Supreme Court (SC) Decision G.R. No. 182645’’ an pinapaheling sa publiko sa paagi kan tarpaulin kan nag-posisyon sa mga bakanteng lote kan Deciembre 29, 2021 ninda Engr. Ben Shea, Roberto Obiedo asin iba pang propriedad nin negosyante na envuelto an labi sa tolong hektarya sa barangay Triangulo, Ciudad nin Naga.

Maabot sa 72 hektarya sa Central Business District II asin pagtaraid na barangay an pigsasabi na propriedad na sadiri kan iredero, alagad igwa gabos na 117 hektarya, base sa desisyon kan Korte Suprema.

An sinambit na desisyon iyo man si pigbiklad na dokumento ninda Salvacion Colarina-Bance, Atty.-in-Fact ni Henry F. Rodriguez, iredero-administrator kan Rodriguez Estate kaibanan si Rene Gomez kan sinda mag-atubang sa press conference na presente an reporter kan Bicol Mail na ginibo kan Hulyo 26, 2017.

Pinaluwas an desisyon kan Corte Suprema kan Enero 11, 2011.

Si Fortunato ‘‘Tato’’ Mendoza, nagsabi na enot nang nag-prubar an taohan kan iredero si Henry Rodriguez sa paagi ni Teofilo Tandaan na mag-posisyon sa saiyang propriedad kan Deciembre 24, 2021 alagad dai man nakaka-presentar sa saiya nin titulo na an dokumentos panahon nin Kastila o Spanish.

Kabale sa apektadong priopriedad na sadiri kan mga negosyanteng sinda Allan, Tan, Romeo Tan asin saro pang nginaranan sanang Cresini.

Sinabi pa ni Mendoza asin iba pang mga negosyante na kun mawot mabawi sa sainda an propriedad mag-sangat nin petisyon sa corte nganing kancelaron an saindang titulo alagad dai ginigibo mantang dai ngani nakakapresentar nin titulo an grupo ni Tandaan.

Sa pag-atubang sa press conference, an iredero kan Hermogenes Rodriguez nangapudan sa mga naka-posisyon sa propriedad na mag-coordinar sa sainda nganing mapakarhay an saindang mga titulo sa daga. An 117 hektarya na gustong mabawi makukua sa Barangay Triangulo, Concepcion Pequeña asin iba pang mga lugar.

An real estate an iredero kan Rodriguez nagpahayag na okupado na kan rinibong residentes, igwa nang mall siring kan SM mall asin propriedad asin edificio kan gobierno.

An nagbabawi kan propriedad na familia Rodriguez nagbuyagyag an isyu kasunod kan naging desisyon kan ‘‘heirship case’’ sa Regional Trial Court branch 34 sa Ciudad nin Iriga na pigsangat kan 1989.

Pinapaheling sa tarpaulin an desisyon kan Corte Suprema No. 182645 sa pig-posisyon na mga lote kan iredero ni Don Hermogenes Rodriguez sa Central Business District II, brgy. Triangulo, Ciudad nin Naga. Si Salvacion Colarina-Bance (wala), Atty-in-Fact ni Henry F. Rodriguez, iredero-administrador kan Rodriguez Estate kaibanan si Rene Gomez (parejong nakatukaw) nagpapaliwanag sa press conference na ginibo kan Hulyo 2017 kun panong sinda an kagrogaring kan 72 hektarya daga na saindang pigbasehan an desisyon kan Korte Suprema kan Enero 2011 (File photo kan Bicol Mail/DPAureus) (DPA)

Sinabi pa an ‘‘heirship case’’ inaabot nin 27 anyos sagcod na pinalmente na resolberan kan SC na an iredero ni Don Hermogenes Rodriguez asin Antonio Rodriguez iyo an may deretso komo iredero kan mga propriedad sa irarum kan Royal Decree No. 01-4 na pig-isyu ni Queen Isabela II kan Espanya kan 1826.

Si Don Hermogenes Rodriguez, Gobernadorcillo kan Manila, mayong agom asin mayong aki, huli kaini an iredero an saiyang tugang na si Antonio, na naka-agom asin may aki ni duwa, na iyo man an may deretso bilang mga iredero.

Base sa desisyon kan SC, an ‘‘great grandson’’ kan Antonio, sa persona ni Henry F. Rodriguez, iyo an na-assigned bilang heir-estate administrator.

Sa pinaluwas asin tinao sa miembros kan media na information sheet, an familia Rodriguez an pigbabasehan na pagbawi iyo an ‘‘Decree No. 01-04 is proven to be imprescriptible, remain valid for ever in the Philippines, existing and exempted from the Law of Prescription and Laches.’’

Sinabi na 117 hektarya an propriedad kan familiya Rodriguez sa ciudad na kabale sa propriedad sa irarum kan Royal Decree asin igwa pa sa Antipolo, Muntinlupa, Pasay, Parañaque, Marikina, Baguio, Angeles, San Fernando, Manila, asin Quezon asin an provincias kan Laguna, Rizal, Cavite, Bulacan, Pampanga, Nueva Ecija, Bulacan, Pampanga, Bataan, Zambales asin Batangas.

An administrador, Henry Rodriguez awtorisado na magpabakal, magbawi kan gabos na propriedad real kabale an ‘‘judicial inventories’’, na pig-isyu kan SC. (DPAureus)