Istoria nin Duwang Amigo

Kan Martes kan nakaaging semana iyo si pagsungko ni Ina sa City Hall, ini sinelebrar sa paagi nin Santa Misa asin pamibi sa patrona kan Ka-Bicolan. Kinahaponan kadto, nakanuparan ko ang sarong katrabaho asin amigo na padagos.

Tamang kumustahan asin orolay sa paabuton na fiesta sa Naga. Habang nag-oolay kami, may inistoria siya manungod sa panahon nin fiesta kan taon 1994, sa memoria niya high school pa sana siya kadto. Bihira ako makadangog kan mga arog kadtong istoria kaya nagpaaram ako saiya na isusurat ko asin iheheras ko ang istoria niya.

Sa istoria niya, igua siyang duwang amigo na nagtatarambay sa Dayangdang sa kamatangaan nin bangui, sa panahon na padangadang na ang fluvial procession o katahawan kan novenario para ki Ina. Giromdom kan duwa kan inistoria ini sa katrabaho ko, alas once na nin bangui ang oras kadto.

Habang nakatambay si duwang mag-amigo nakahiling sinda nin naglalakaw na gurang na babae na nakasulot nin puting gubing, maliwanag asin nagsisilyab na may dara-darang dakulaon na sira. Hinapot asin kinaolay kan duwa ang gurang na babae, “Masaen ka po, tano nagsosolo-solo ka?” Nagsimbag ang babae, “Hale ako sa harong, nagkiling sa direksiyon kan kalye pasiring sa Balatas (o sa Basilica).

May saro pang hapot sinabi si babae bilang simbag sa sunod nindang hapot, kundi nalingaw ako. Sa sunod na sana ta ihahapot ko saaga sa katrabaho ko.

Pakatapos kan halipot na orolay nag-direchong lakaw ang gurang na babae asin nawara na sana bigla. Segun sa pakaistoria sa katrabaho ko kan duwang amigo niya, nagtutubod sinda na si Ina ang saindang na-engkwentro asin nakaolay ta nasa mga aldaw kan saiyang ka-fiestahan.

Ang interpretasyon ninda, si paglakaw-lakaw kan gurang na babae hale sa saiyang harong iyo na ang rason kung tano may taunang Traslacion, nagduduman siya sa Catedral. Dai lang ninda mainterpretar kung ano ang kahulugan o simbolismo kan dakulang sira na dara-dara kan gurang na babae kan banguing ito.

Ginirabuhan si katrabaho ko kang inistoria niya ini sako, dai niya daa malingawan si inistoria saiya kan duwa niyang amigo. Tubod siya ta duwa ang naka-eksperiyensiya kan pangyayari, ta kung saro sana puedeng gibo-gibo lang ang istoria. Kung duwa, may testigo. Testigo sinda kan kada saro. Kung imahenasyon ang naggagana kadto baad imposible na aram ninda ang imahenasyon na nagdadalagan sa isip kan kada saro.

Misteriosong istoria para sako, alagad katubod-tubod man. Mayo pa man akong eksperiyensiya arog kan nakaaging istoria pero amay asin nagdakula ako na deboto ni Ina, saro akong voyador poon pa kan ako grade 6.

Pirmi kong sinasabi na bako akong mahilig mag-plano sa buhay. Dai ko aram ang simbag sa mga job interview na “where do you see yourself 5 years from now?” Sa pagka-piripilosopong isip ko, mayong nakakaaram kan mangyayari sa sunod na aldaw, limang taon pa kaya? Ano ta ma-plano ka pa man kan buhay, na maagi man lang baga kita sa ibabaw kan kinaban? Para que?!

An pirmi kong pangadie, giya asin grasya. Garo mga paraoma asin parasira. Sisay man may aram kan eksaktong ani o dakop na sira kan lambat? Mayo. Igua nin panundon o tamang proseso alagad yaon ang mga bagay na mayo kitang kontrol kaya ini hinahagad ta sa pangadie. Sa grasya kan Mahal na Dios, biyayaan kita nin marhay na ani asin ligtas na palakaya.

Maria, Nuestra Señora de Peñafrancia, samuyang Ina. Ipamibi mo kami.