Istorya Sa Binanuanan Kan 1984

Sarong bangui, sa sarong harong na tiklad sa bukid na lugar kan Binanuanan Pequenio, nag uurulay sinda Gurang Bastian na agom ni Lola Talya, asin an mga parientes na an pinag oorolayan iyo an pag presenter kan saindang aki na si Rodrigo na gustong agomon si Rafaela na taga Barrio Santa Teresita sa banwaan nin Canaman. Kan panahon na idto ang lugar kan Binanuanan mayo pang toltol na tinampo ta ini, malaboy kung kaya kadaklan nag uusar nin pamaba nin damulag, alagad ang Barrio kan Sta. Teresita sa banwaan nin Calabanga, maliwanag na sa elektrisidad asin iguang marhay na tinampo ta ini iyo ang sunod na Barrio sa Tibgao.

Orogmahon an familyang Abilende na dakula ang angkan ta gulpi sindang maatender sa kasalan na puedeng gibohon sa simbahan kan La Porteria na mina fiesta tuyong Setyembre 8 na haros pirmeng kasabay kan Traslacion sa Naga.

Sa marumarom na Liwanag nin gazera, madadangog an tanog nin mga duli-duli, maaaninag ang Liwanag kan mga anininpot sa mga kahoy na natatanawan sa mga bintana kan harong, kung kaya magayon ang pag ribayan nin suhestyon kung ano an dapat na darahon sa aldao nin pag presentar ki Rafaela. Si Gurang Bastian, iguang magayon na plano, na ang presentaran gibohon sa New China Restaurant ta siguradong maoogma ang mga magurang ni Melissa ta masiram duman an Pancit Guisado na iguang masiramon na bola-bola. An Pancit Guisado, sasabayan nin steam siopao asin igua pa nin mga Tru Orange asin mahamot na kape.

Igua man nin suhestion si Lola Talya asin ini an dapat daang gibohon ang presentaran sa lugar mismo ni Rafaela, kaya lang sinabi ni Rodrigo na deficil magduman sa harong ni Rafaela ta malaboy asin mahalnas ang dalan na ba’sug sa tahaw nin paroyan. Sabi ni Rodrigo, saro sana ang importante ki Rafaela, na sa aldao kan pag presentar, magdara daa sinda nin mapulot asin masiram na sinuman ta iyo an ipapakakan sa mga tugang na mawawalat sa Linyaga ta deficil ang biyahe pasiring sa New China asin an familya ni Rafaela madara man nin sarong kaserola nin maharang na Pinangat. Ogmahon an mga parientes ni Rodrigo ta sa aldao kan pag presentar, maderecho na sindang mag dalan nin sine sa Bichara ta bihira sindang makalarga pasiring sa Naga ta malaboyon pa ang dalan sa Binanuanan Pequenio.

Nakasal sinda Rodrigo sa Parokya kan Our Lady of Assumption sa Poblacion kan Canaman asin bako duman sa La porteria ta nakaugalian na ang kasal, dapat gibohon sa simbahan kan kagbabaye. An istorya na ini naguno sana sa istorya man nin mga tawong naghahalat nin malulunadan sa terminal kan biyahe pasiring sa Tinambac. Ini sarong tunay na pangyayari alagad dai na nanggad nin pagka isi kung ang mga peronalidad sa istoryang ini nabubuhay pa o kung sain na sinda nag iistar.