Istorya sa People Power pigtutukdo sa Elem, H/S

An EDSA People Power Revolution aram na kan mga estudiantes sa elementarya asin secondarya an istorya mientras na kabale ini sa curriculum na pigsaro sa subject kan Aralin Panlipunan nin huli ta mandato na ini kan Departamento de Edukasyon na dapat itukdo sa mga estudiantes.

Si City School Division Superintendent Manny De Guzman kan Ciudad nin Naga nagpahayag kaini sa tahaw kan ginibong pagkomemorar kan ika-36 na anibersaryo kan matuninong na rebulosyon kan Febrero 25, 1986.

Kan siya maestro pa sana magayonon na topic sa Aralin Panlipunan saro ini sa subject na saiyang pigtutukdo na kabale digdi an istorya kan 20 anyos na Martial Law kan diktador dipuntong Ferdinand Marcos Sr. asin an ‘‘bloodless revolution’’, sabi pa ni De Guzman.

Sinabi pa apreciado kan mga estudiantes an leksyon mapadapit sa martial law asin Edsa People Power 1 naheheling ninda an mga retrato sa libro. An kahalagahan kan konsepto na manudan kan mga aki an kahalagahan kan democracia na an gobierno ta sa Filipinas nagsasabi an nasusunod dapat an taong bayan. Huli kaini kun an kagustohan kan taong bayan dai na nasusunod sa trabajo kan gobierno digdi na nalaog an deretso kan tawo magkurahaw asin maggibo nin paagi na maibalik an sinasabi kan gobierno na dapat kita sarong democracia.

An na-iiba sa People Power 1 na saro nang international history an nangyari sa Filipinas kan Febrero 25, 1986 sarong ‘‘bloodless revolution, sabi pa kan opisyal kan DepEd.

Sa Ciudad nin Naga nagkaigwa nin simpleng programa sa pagkomemorar kan Edsa People Power Revolution, na nagsagibo nin sarong Wreath-Laying Ceremony sa People Power Monument sa P. Burgos Street sa centro kan ciudad.

Pinangenotan an okasyon ninda 3rd district Congressman Gabby Bordado kan Camarines Sur, Bise Alcalde Nene de Asis, mga miembros kan Sanggunian Panlungsod, DepEd Division Supt. De Guzman, Naga City Police Office, Boy Scouts of the Philippines, National Historical Commission of the Philippines, asin an Chaplain kan Ateneo de Naga University, Fr. Jun Embile.

Sa saindang mga mensaje pigtawan nin punto kan mga opisyales na dapat dai paglingawan an mga estorya kan nakaagi, asin magin segurado sa bobotohan na lider kan satong nasyon sa maabot na eleksyon sa Mayo 9, 2022. Nganing dai na mangyari liwat an mapait na esperiencia sa lindong kan diktadorya Marcos. (dpa)

Mga opisyales lokal kan City Hall sa pamamayo ni Bise Alcalde Nene De Asis, mga consejales, 3rd district Congressman Gabby Bordado kan Camarines Sur, DepEd asin iba pang sektor nagpakua nin retrato matapos kan simpleng pagrumdum kan ciudad sa ika-36 na taon kan EDSA People Power Revolution na ginibo sa People Power Monument sa centro kan ciudad. (CEPPIO)